Accueil > Amakuru > Muri Afrika > Afrika y’Epfo : Umurundi umwe niwe yakomerekeye mu migumuko
Afrika y’Epfo : Umurundi umwe niwe yakomerekeye mu migumuko
vendredi 24 Ndamukiza 2015
Umurundi umwe niwe yakomerekeye mu gihugu ca Afrika y’Epfo, imyuma y’aho habereye isekeza ryo kwica, no gutoteza abanyamahanaga baba muri ico gihugu.
Nk’uko bivugwa n’umwe mu barundi baba muri ico gihugu, igiporisi ca Afrika y’Epfo cararengewe n’ubwo bwicanyi, aho abanyagihugu bo muri ico gihugu bumviye ivyo bari batumwe n’umwami w’ubwoko bw’aba zoulou Goodwill Zwelithini, kwomora abo bose b’abanyamahanga baba muri ico gihugu. Abantu indwi rero nibo bivugwa ko bapfuye urw’agashinyaguro, abandi bantu batari bake barata barahunga, mu gihe hari n’abasubiye mu bihugu vyabo.
Ubuserukizi bw’Uburundi muri ico gihugu c’Afrika y’Epfrika y’Epfo bukaba bwarahumurije abarundi baba muri ico gihugu, nk’uko aya makuru tuyakesha bamwe mu barundi baba i Durban muri Afrika y’Epfo. Kugeza ubu rero, igisirikare n’igiporisi bikaba bikora ijoro n’umutaga mu gufata abo bose bakoze ayo marorerwa, yo kwica abanyamahanga. Abarenga icumi, baramaze gufatwa, bashikirizwa inzego z’umutekano.
Tukabamenyesha ko, umukuru w’igihugu ca Afrika y’Epfo ategekanya kubonana n’abanyamahanga baba muri ico gihugu, abaserukira abandi bahaba. Bikavugwa ko n’umukuru w’igihugu ca Mozambique yoba ahava aja muri ico gihugu, kuremesha abo mu gihugu ciwe bahungiye hagati mu gihugu ca Afrika y’Epfo kubera imvo z’umutekano muke wabo.
Aristide Nizigire
