Akandi gashimwe kuri Denise Nkurunziza

Agashimwe kagenewe abatambukanyi b’abakuru b’ibihugu vya Afrika bitanze kurusha abandi mu guharanira agateka k’abakenyezi, katangiwe i Banjul ku murwa mu kuru w’igihugu ca Gambiya, aho n’umutambukanyi w’umukuru w’igihugu c’Uburundi yarimwo.

Ahejeje kuronswa ako gashimwe, umutambukanyi w’umukuru w’igihugu c’Uburundi Denise Nkurunziza, akaba yamenyesheje n’umunezero ntangere ko, ako gashimwe yaronse ari iteka kuri we, ndetse no ku gihugu cose. Umutambukanyi w’umukuru w’igihugu c’Uburundi, akaba atibagiye ndetse n’ugushimira umutambukanyi w’umukuru w’igihugu ca Gambiya Zineb Yahya Jammeh, kubona WAF (Women Advancement Forum – WAF 2014) yaramwizeye, ikamushira mu bapfasoni baronswa ako gashimwe. Denise Nkurunziza akavuga ko muri iki kinjana ca 21, abashingantahe babwirijwe kumenya ko, abakenyezi bategerezwa kuronswa agateka kabakwiriye, mu gufashanya n’abagabo mu guharanira iterambere ry’ibihugu.

Mwomenya ko, ako gashimwe karonkejwe abapfasoni batandukanye b’abakuru b’ibihugu vyo muri Afrika, harimwo nka Denise Nkurunziza umutambukanyi w’umukuru w’igihugu c’Uburundi, Zineb Yahya Jammeh wo muri Gambiya, Marieme Faye Sall wo muri Senegal, Hadidja Aboubacar L. Dhoinine wo mu mazinga ya Comores, Sia Koroma wa Sierra Léone, Olufunso Amosun wo mu gihugu ca Nigéria ndetse akaba ari no mu murwi urongoye WAF 2014, n’abandi banyacubahiro nka muganga Isatou Njie Saidy, icegera c’umukuru w’igihugu wa Gambiya.

Inyuma y’urwo rubanza rwari rwakoranije abapfasoni barenga 1500 bo mu bihugu bitandukanye vy’Afrika, umukuru w’igihugu ca Gambiya, akaba yaciye abakira, aho uwo mubonano wabereye mw’ibanga.