Amajambo yo kwirinda kubwira umuvyeyi ahejeje kwibaruka

Mu migenzo yo kw’isi yose, iyo umuvyeyi yibarutse baramugendera, bakamwibarutsa, bakamwipfuriza kurwira, bakamukeza ko yasimvye imanga ariko rero ngo hari amajambo tudakwiye kumubwira igihe tumugendeye, nayo ni nk’aya :

1. Yooo akana kawe ni gato!!

Mu kibano, iyo umwana avutse avyibushe kenshi baca babona ko afise amagara meza. Ariko rero iyo umuntu yibarutse akana katavyibushe ucubona umenga nta magara gafise. Amajambo nk’ayo rimwe na rimwe arashobora gutuma umuvyeyi ashavura canke yihebura. Nimwihangane kubivugira impande yiwe.

2. Yooo ntuzokwonsa!!

Ukwonsa umwana ni ikintu umuntu ahitamwo. Abakenyezi benshi bibarutse usanga bumva umenga batawe impande y’ico kibazo gituma umuntu acagira ibibazo. Turazi akarorero nk’abakenyezi bagendana umugera wa sida hari igihe usanga batarekuriwe kwonsa umwana, ivyo bikabababaza kandi bikabatuma bahungabana muribo.

3. Uzosubira ku kazi ryari ?

Ivyo ni ibibazo dukunda kubwira abantu baba bibarutse na cane cane abo mukorana baje kukugendera, umuvyeyi ahejeje kwibaruka namwe muca mumucisha ku biti no ku mabuye mumubaza ryari azogarukira ku kazi. Nimutekane mumurekere akanya ko kuraba uwo mwana wiwe hama asubirane intege bukebuke.Ni nayo mpamvu hariho akanya ko kuruhuka ku bakenyezi bibarutse.

4. Wategerezwa kuryama igihe umwana wanyu aryamye

Mu bisanzwe nimwirinde impanuro zivyo umuvyeyi yotegerezwa gukora nivyo adategerejwe. Mu bisanzwe, umwe wese arazi ingene yifata igihe akayoya kavutse kandi ibibashobokera mwebwe bishobora kudashobokera uwundi. Nimureke yifatire ingingo,niwe ari umuvyeyi. Biri muvyo asanzwe ajejwe. Ivyo tubivuga kuko tuzi ko rimwe na rimwe usanga abakenyezi benshi baremerana, bavuga ivyo umwe yagize uwundi akubwira ivyiwe ukabura ivyo ufata nivyo ureka.