Amakenga ni menshi ku duzwa ry’ibiciro vy’ibifungurwa

Umusi mukuru wo kwikukira kw’Uburundi uhuriranye n’igenekerezo ry’ishirwa mu ngiro ry’ingingo yo gutangisha itagisi ku vyimburwa vya nkenerwa ku barundi vyari bimaze umwaka vyakuweko ayo matagisi. Muri ivyo biribwa bigiye gutangishwa itagisi twobabwira ibikenerwa cane n’abanyagihugu bato bato nk’imyumbati, ifu y’imyumbati, ibiyoba, ibiraya, ibiharage, amavuta, umuceri.

Léonidas Hatungimana, umuvugizi w’umukuru w’igihugu c’Uburundi akaba yari yarabimenyesheje igihe yari mu kiganiro n’abandi bavugizi b’ibisata bigize akazi ka Leta, aho yasiguye ko abanyagihugu bakwiye kumenya ko ikori n’amatagisi bifasha mw’iterambere ry’igihugu.

Ariko rero n’aho biri ukwo, abanyagihugu babona ko iyo ngingo ije gusongera isibe ku bukene bwari busanzwe bwokora amatara bugata. Abo twashoboye kuganira ku musi w’ejo bariko bahimbaza ukwikukira kw’igihugu bamenyesheje ko bigiye kugorana cane mu gihe n’amikoro yabo adashemeye, bagasaba Leta ko yofata izindi ngingo mu ntumbero yo kurinda kigoyi abeneburundi.

Bisunze amakenga ko ibiciro vy’ibifungurwa vya nkenerwa vyoba bizoca biduzwa kubera ayo matagisi, abo banyagihugu babandanya bamenyesha ko batabona ingene bagiye gutunga imiryango yabo kuko n’imishahara baronka ari intica ntikize.

Tubibutse ko iyo ngingo yo gutangisha amatagisi ku vyimburwa vya nkenerwa ku banyagihugu igiye mu ngiro inyuma y’aho abahurikiye mu runani rw’abarwanya ubuzima buzimvye basabiye inama nshingamateka ko yovyitondera.