Amasendika y’abigisha yafashe ingingo yo kubangira kuri yegereyegere

Abigisha bahurikiye mu masendika STEB, SLEB, CONAPES na SYNAPEP, bafashe ingingo yo kubangira kuri yegereyegere bogiyemwo mu ntango z’igice ca gatatu. Mu gihe kandi ata manota batanze y’iki gice ca kabiri c’umwaka w’ishure w’2014-2015, bamenyesha ko bagiye kuyatanga.

Abo bigisha bamenyesha ko bafashe iyo ngingo inyuma yaho baboneye ko ibiganiro hagati ya Reta nabo bigeze ku ntambwe ishimishije, nk’uko bishikirizwa na Eulalie Nibizi, arongoye sendika STEB (syndicat des Travailleurs de l’ Enseignement du Burundi).

Eulalie Nibizi arongoye sendika STEB

Tubibutse ko abo bigisha bari bahakanye gutanga amanota y’igice ca kabiri, mu gihe Reta itobumviriza igakosora ubusumbasumbane bw’imishahara. Abo bigisha bahurikiye muri ayo masendika bakaba batatanze amanota y’igice ca kabiri, kuko bavuga ko ibiganiro bindi bakorana na Reta, n’ivyigwa vy’abahinga batandukanye vyose vyabaye impfagusa.
Abo bigisha bavuga ko ata kindi basaba, atari uko imishahara yabo yoharurwa hakurikijwe amategeko, kuko bitumvikana ingene umushahara wanaka usumbana n’uwo bakorana, canke uwukora mu kindi gisata, ntibatahure igituma umushahara munaka ku rupapuro rw’umutsindo nk’urwo nyene, itangana, bagasaba ko ubwo busumbasumbane bwokurwaho.