Amashirahamwe atanu yitwaye mu murwi wa Afrika ujejwe agateka ka zina muntu

Uburundi butegerezwa kuzotanga insiguro imbere y’Umurwi wa Afrika ujejwe ivy’agateka ka zina muntu (Commission Africaine des Droits de l’Homme et des peuples) ku bijanye n’ibirego bitari bike vy’ubwicanyi ndengerabutungane (cas d’exécutions extrajudiciaires)

Bubaye ubwa mbere amashirahamwe yigenga yitura Umurwi wa Afrika ujejwe ivy’agateka ka zina muntu mu nzira yo kurondera ubutungane ku madosiye y’ubwicanyi ndengerabutungane yananiranye gutunganywa n’ubucamanza bw’igihugu. Ni muri iyo ntumbero amashirahamwe yigenga aherutse gushikiriza Umurwi w’Afrika ujejwe ivy’agateka ka zina muntu amadosiye ane ajanye n’ubwicanyi ndengerabutungane bwakozwe hagati y’umwaka w’2010 n’umwaka w’ 2012.

Hagati y’umwaka w’2010 n’umwaka w’2012, harakozwe mu Burundi ivyaha bitari bike vy’ubwicanyi ndengerabutungane bwagirirwa cane cane abatavuga rumwe n’umugambwe uri ku butegetsi. Ukwo kwaka ubuzima ikiremwamuntu ata nzira n’imwe y’ubutungane ikoreshejwe kandi bukabonekamwo bamwe mu bari mu nzego z’igihugu ntibwigeze buhanwa n’ubutungane gushika uno musi, nk’uko tubikura mu rwandiko rwashizwe ahabona n’urunani rw’amashirahamwe atanu ariyo ACAT-Burundi, APRODH, FOCODE, FORSC hamwe na TRIAL, ashigikiwe n’ishirahamwe mpuzamakungu Human Rights Watch HRW. Ayo mashirahamwe yaramaze gushikana ibirego imbere y’Umurwi w’Afrika ujejwe ivy’agateka ka zina muntu, ivyo birego bikaba vyakiriwe kuri uwu wa kabiri igenekerezo rya 17 Ruheshi 2014.

Ayo mashirahamwe yitwaye ku manza z’abantu bane bagandaguwe bamwe muribo bari mu minwe y’inzego z’umutekano

Urubanza rwa mbere ni urw’urupfu rwa Jackson Ndikuriyo, yatowe ikiziga kw’igenekerezo rya 27 Myandagaro 2010, mu karere gakorerwamwo n’igiporisi ca Komine Musigati, intara ya Bubanza, inyuma gato akaba yari yahagaritswe
n’abajejwe umutekano. Amezi make gusa imbere y’uko agandagurwa, yari amaze imisi agirwako iterabwoba ridasanzwe ko ashobora kugandagurwa na bamwe bamwe mubari mu nzego z’igihugu.

Urubanza rwa kabiri ni urw’urupfu rwa Audace Vianney Habonarugira, yatowe ikiziga kuwa 15 Mukakaro 2011 ku mutumba wa Gasamanzuki muri komine ya Isare, intara ya Bujumbura. Yishwe inyuma y’aho ahatswe kugandagurwa muri Ntwarante 2011, hamwe n’iterabwoba ridasanzwe yagiriwe, ababikora hakaba harimwo bamwe mu bakorera inzego za Reta.

Urubanza rwa gatatu ni urw’urupfu rwa Médard Ndayishimiye, yanyurujwe mu nyuma agatorwa ikiziga kw’igenekerezo rya 7 Gitugutu 2011 mu ntara ya Rutana, bikaba vyarabonetse ko imbere yo kwicwa yabanje gukubitwa no gusinzikarizwa ubuzima. Amezi atari make imbere y’iryo gandagurwa, Médard Ndayishimiye yaboneka
nk’uwukurikiranwa cane n’igiporisi kandi yaragiriwe iterabwoba ridasanzwe na bamwe mu bakorera inzego z’igihugu.

Urubanza rwa kane ni urw’urupfu rwa Jean-Claude Ndimumahoro batazira NZUNGU. Yatowe yakerewe umutwe kw’igenekerezo rya 3 Mukakaro 2012 ku musozi Mpehe wa zone Bugarama, komine n’intara ya Muramvya akaba yari yabanje gupfungirwa imisi itari mike mu kigo c’urwego rushinzwe igendereza mu ntara ya Gitega.

Pacifique Nininahazwe wa FOCODE (i buryo), ari kumwe na Vital Nshimirimana wa FORSC (hagati), hamwe n’umushingwamanza Armel Niyongere arongoye ACAT

Nk’uko bivugwa na Pacifique Nininahazwe, arongoye FOCODE, rimwe muri ayo mashirahamwe yafashe ingingo yo kwitwara mu murwi wa Afrika ujejwe ivy’agateka ka zina muntu, izo manza zine nizo zimaze gukwiza ivyemeza, bakaba kandi babanje kwibonera ko Uburundi bwa Reta y’Uburundi butariko burazikorerako. Kubwa Pacifique Nininahazwe, ukwo kwitwara kubaye mu ntumbero yo kubandanya urugamba rwo kurwanya ukudahana ivyaha bidasanzwe vyo guhohotera ubuzima n’uburenganzira bwa kiremwa muntu, na cane cane mu ntumbero yo
gukinga ko ubwo bubisha bwobandanya bwongerekana mu gihugu, ari navyo vyohava bisubiza inyuma amahoro yabonetse bigoranye.

Urunani rw’ayo mashirahamwe atanu rwaboneyeho akaryo ko gusaba umurwi w’Afrika ujejwe ivy’agateka ka zina muntu ko wofata ingingo mfatakibanza (des mesures conservatoires) kugirango bagondoze Reta y’Uburundi ku bijanye no gukingira imiryango yabuze, ivyabona hamwe n’abaharanira agateka ka zina muntu bariko barakora kuri ayo madosiye.

Tubamenyeshe ko inyuma y’ugusuzuma ivyo birego vy’ayo mashirahamwe yitwaye, uwo murwi wa Afrika ujejwe ivy’agateka ka zina muntu azoshikiriza Reta y’Uburundi ivyokorwa. Mu gihe Reta y’Uburundi itokora ivyo izosabwa, umurwi wa Afrika ujejwe ivy’agateka ka zina muntu uzoshobora guca witwarira Uburundi muri sentare ya Afrika ijejwe agateka ka zina muntu.