Amerika ibandanya ifatira ibihano igihugu c’Uburusiya

Amashirahamwe y’abanyamerika y’amakarata Visa na Mastercard yahagaritse atarinze kugabisha gusubira gukorana n’amabanki y’abarusiya mu kuriha abakiriya bayo muma banki, inyuma yaho ku munsi wa kane Reta ya Obama ifatiye ingingo yogufatira ibihano igihugu c’Uburusiya.

Mw’ibanki Rossia, iri muzafatiwe ibihano n’abanyamerika, mu kiganiro bahaye abamenyeshamakuru ku munsi wa gatanu bamenyesheje ko ayo mashirahamwe Visa na Mastercard yahagaritse gukorana n’ayo mabanki batarinze kugabisha.
Ibanki SMP isanzwe icungerwa na Arkadi hamwe n’uwitwa Boris, aho amazina yabo nayo yoba yarongewe ku rutonde rwabo igihugu ca Reta zunzubumwe za Amerika zizofatira ibihano, bavuga ko muri kino gihe umukiriya wabo adashobora gutora amafaranga akoresheje ayo makarata.
Abakiriya bayo mabanki yafatiwe ibihano ntibigikunda ko bagura utuntu bakoresheje ayo makarata.

Ku munsi wa kane, umukuru w’igihugu ca Reta zunzubumwe za Amerika Barack Obama yaramenyesheje ko urutonde rw’abategetsi b’abarusiya bazofatirwa ibihano rugiye kwongerekana, muri abo hakaba harimwo ba nyene amabanki bakomeye begereye umukuru w’igihugu Vladmir Poutine.
Ivyo bihano rero bizotuma Uburusiya butagisubira gukorana n’amashirahamwe akomakomeye yo muri Reta zunzubumwe za Amerika.

Mwomenya ko intanduruko y’ivyo bihano yavuye kw’itegeko ryateweko igikumu na Vladmir Poutine aho akarere ka Crimée kari mu bumanuko bw’igihugu ca Ukraine kagiye gufatanwa n’igihugu c’Uburusiya.