Amerika itegekanya kurungika abasoda 3000 muri Afrika y’Uburengero kurwanya Ebola

Reta zunze ubumwe za Amerika ziteguriye kurungika abasoda 3000 muri Afrika y’Uburengero kugira bagerageze kurwanya ikiza ca Ebola. Bakazofasha mu kwubaka ibigo bishasha vyo kuvuriramwo hamwe no kwigisha abazotwara ivyo bigo.

Nk’uko umwe mu bakuru bo muri Amerika yabivuze, umukuru w’igihugu ca Reta zunze ubumwe za Amerika, Barack Obama, araza kumenyesha kuri uwu kabiri, irungikwa ry’abasoda bashika 3000 muri Afrika y’uburengero mu rugamba rwo kurwanya umugera wa Ebola.

Barack Obama

Inguvu nyinshi z’abo banyemerika bazorungikwa zikazokoreshwa muri Liberia, kimwe mu bihugu bitatu vyakozweko cane n’ico kiza, hamwe na Sierra Leone na Guinée. Ikigo c’abo basirikare kikazoja ku murwa mukuru i Monrovia.

Barack Obama avuga ko abo basoda bazofasha cane cane mu kwubaka ibigo bishasha vyo kuvuriramwo mu turere twakozweko cane n’ico kiza. Reta ya Amerika nayo ikazofasha mu kwinjiza no kwigisha abantu bazorongora ivyo bigo.

Tubamenyeshe ko ishirahamwe ry’abanyamerika ry’iterambere mu makungu (USAID), ryifatikanije n’ishirahamwe ryitaho ineza y’abana (UNICEF), rizotanga ibikoresho vyo kwikingira mu miryango y’abanyaliberia ishika ku bihumbi amajana ane (400 000 familles) igeramiwe cane n’ico kiza ca Ebola.