Accueil > Amakuru > Muri Afrika > Amoko yo muri Kivu yagiriza abanyamurenge gukorana na M23
Amoko yo muri Kivu yagiriza abanyamurenge gukorana na M23
samedi 25 Rusama 2013
Mu gisagara ca Bukavu muri Kivu y’Ubumanuko isanzwe ndetse iri mu Buseruko bwa Republika iharanira intwaro rusangi ya Kongo,ejo hiriwe itana mu mitwe hagati y’abanyamurenge n’ayandi moko.
Vyatanguye igihe abanyeshure b’abanyamurenge bakubitwa bagakomereka, ndetse bamwe baja no mubitaro. Inyuma yaho, imisore y’Abanyamurenge yaciye izibira ibarabara, ihagarika amapikipiki aca mu gisagara.
Imisore yo mu moko y’abarega, Abashi, Ababembe n’abandi, yaciye iza haca hatangura guterana amabuye.
Itana mu mitwe ryabandanije gushika nk’igihe c’isaha zitatu zo mu gitondo, igipolisi nico caciye kiza, kija hagati gisukamwo mabisi. Naho ico bapfa kitamenyekanye neza, ngo abo Banyamurenge boba bagirizwa kugirana ubucuti n’umurwi wa M23.
Abasanzwe bahaba bavuga ko uruhagarara ruhasanzwe, ariko gukozanyako hagati y’ayo moko bishika iyo hagize ikiba muri Kivu y’Uburaruko.
Abajejwe intwaro harimwo na buramatari wa Kivu y’Ubumanuko bahagurukiye mwene ubwo buguma, bakaba banashitse ku bitaro kuraba abakomeretse.
Bivugwa kandi ko hariko haraba amatohoza yo kumenya abatanguye ako kaguma kugira bahanwe. Muri uno mwanya umutekano wagarutse mu gisagara ca Bukavu.
Aristide Nizigire