Accueil > Amakuru > Rwanda > Atagikozwe ibintu birashobora kuyangara hagati y’Urwanda na Kongo
Atagikozwe ibintu birashobora kuyangara hagati y’Urwanda na Kongo
vendredi 30 Myandagaro 2013
Leta y’Urwanda iragabisha igihugu ca Republika iharanira intwaro rusangiya Kongo ko itagiye kurera amaboko mu gihe, abasirikare ba Republika iharanira intwaro rusangi ya Kongo bobandanya batera ku butaka bwabo.
![](local/cache-vignettes/L600xH347/intwaro_ingabo_nazo_ziri_kubyombo_2_-f6b00-39770-53696.jpg?1517266532)
Kuri uyu wa kane igenekerezo rya 29 Myandagaro mu gihe c’inyuma y’umutaga, igisirikare c’Urwanda cararungitse ibirwanisho bikomakomeye ku rubibe ruhana na Kongo, kugira rwivune ku bitero bagiriza abasirikare b’ico gihugu ku butaka bw’abo, ndetse hakaba hamaze guharurwa abantu bagera kuri batatu, bamaze kuhasiga ubuzima muri iyi minsi.
![](local/cache-vignettes/L672xH449/mus-2-6b158.jpg?1550913203)
Mw’itangazo ryashizwe ahagaragara ku mugoroba w’uyu wa kane na Louise Mushikiwabo, umushikiranganji w’imigenderanire y’Urwanda n’ibindi bihugu, avuga ko ibitero vya Kongo ku butaka bw’Urwanda badashobora kuvyihanganira namba. Abanyagihugu b’Urwanda akaba aribo barwa muri ivyo bitero vyagirizwa abasirikare b’igihugu ca Republika iharanira intwaro rusangi ya Kongo. Mushikiwabo avuga ko Leta y’Urwanda yagumye yihanganye, ariko ko ako gasomborotso abadashobora kuguma bakihanganiye. Umushikiranganji w’imigenderanire y’Urwanda n’amakungu akaba yarangije avuga ko bafise ubushobozi bw’ukumenya uwabateye, kandi Leta arimwo ikaba ariyo itegerezwa gucungera umutekano w’abanyagihugu bayo.
![](local/cache-vignettes/L572xH273/rwanda-17384.jpg?1517266533)
Ababikurikiranira hagufi bakaba bavuga ko hamwe atagikozwe, ibintu bishobora kuyangara hagati y’Urwanda na Republika iharanira intwaro rusangi ya Kongo.
Aristide Nizigire