Audrey Iteriteka yabaye igihangange kw’isi kubera indirimbo ya Beyonce

Audrey Iteriteka wo mu ntara ya Gitega yabaye rurangiranwa mu mihingo itandukanye y’isi yose kubera ubuhinga bw’ukuririmba yerekanye mu ndirimbo “Halo” y’Umunyamerikakazi Beyonce Knowles.

Mu mpera z’umwaka wa 2015, ku mihora ngurukanabumenyi ya Facebook, Twitter na Instagram, hanyuragiranwe amasanamu ya Audrey Iteriteka aririmba “Halo”, ibintu vyatangariwe na benshi kuko iyo ndirimbo yayisubiriyemo n’ijwi ryiza ryerekana ko afise ubuhinga bukomeye mu kuririmba.

Audrey Iteriteka amaze gusubiramo iyo ndirimbo, ibimenyeshamakuru vyinshi vyo mu Burundi vyabandanije kuvuga ubwo buhinga bwiwe gushika aho ikinyamakuru citwa “A plus” co muri Reta Zunze ubumwe za Amerika casohoye inkuru yiwe, bituma izina ryiwe rimenyekana ku rwego rukomeye kw’isi yose.

Mw’ijoro ryo kuri uwu wa kane igenekerezo rya 3 Ntwarante 2016, umuririmvyi Lil Wayne yanditse ku muhora wiwe wa Facebook ko yabonye muri Audrey Iteriteka ubuhinga budasanzwe.

Mu masaha make gusa Lil Wayne ashize ubwo butumwa kuri Facebook, abantu bagera ku bihumbi 7200 bagaragaje ko bibanezereye [Like] mu gihe abarenga igihumbi bakwiragije (partager) ivyo Lil Wayne yanditse.

Mu vyiyumviro vyatanzwe, benshi basavye Lil Wayne kwinjiza uwo mukobwa mu murwi wa Young Money, abandi bagasaba Ellen Degeneres ko yomutumira mu kiganiro ciwe.

Mu ndwi zitatu ziheze nazo, umuririmvyi Taio Cruz nawe yanditse amenyesha ko Audrey Iteriteka afise ingabirano idasanzwe.

Abo baririmvyi bakomeye kw’isi bariko bakwiragiza ayo makuru ya Audrey Iteriteka w’imyaka 18 y’amavuka, mu gihe aho ari mu ntara ya Gitega atanazi ibimuvurwako. Aho asanzwe yiga kuri Lycée Sainte Thérèse y’i Gitega, Audrey Iteriteka ariko akora ibibazo vy’ishure (Examens) bisozera igice ca kabiri c’umwaka w’ishure.