Bamwe mu barongoye amakaritiye baragirizwa kunyuruza imfashanyo z’abahuye naya mvura

Umuyobozi w’intwaro mu bushikiranganji bw’intwaro yo hagati mu gihugu, amenyesha ko agiye gukora ibishoboka kugira abarongoye amakaritiye yo mu Buraruko bw’igisagara bagirizwa ubunyonyezi bahashwe.

Ivyo Teresiyo Mbonabuca akaba yabivuze inyuma yaho bamwe mu barongozi b’amakaritiye yo mu Buraruko bw’igisagara ca Bujumbura bagirijwe kuba bari mu banyuruza imfashanyo zigenewe gufasha abahuye n’ivyago vya ya mvura; iheruka gusasika inganda mu makomine amwe amwe y’intara ya Bujumbura hamwe n’igisagara ca Bujumbura.

Bamwe mu bahuye n’ivyago bakaba bagumye batakamba ko abarongoye amwe mu makaritiye bagira amanyanga. Amwe akaba ari ukwandika abatahuye n’ivyago n’ayandi manyanga agirwa n’abo bategetsi bo hasi. Iyo ngendo rero abasanzwe bayifise bakaba bagiye guhagurukirwa bahashwe, eka ndetse n’abandi boba bafise ako gatima bagasubize hasi nk’uko bivugwa na Mbonabuca.