Barack OBAMA yashigikiye icese Hillary Clinton

Umukuru w’igihugu wa Reta Zunze Ubumwe za Amerika, Barack Obama, yashigikiye icese Hillary Clinton. Barack OBAMA akaba yabikoze inyuma y’ibiri Hillary Clinton, yahoze ari umushikiranganaji ajejwe imigenderanire, ashikanye igitigiri gikenewe c’intumwa zizoshikiriza amajwi mw’ikoraniro rikuru ry’umugambwe w’Abademokrate, mu kwezi kwa Mukakaro.

Barack Obama yakeje Hillary Clinton kuba yinjiye mu mateka, mu kuba ariwe yitezweko kuzoserukira umugambwe w’Abademokrate, mu matora y’umukuru w’igihugu azoba muri Reta Zunze Ubumwe za Amerika, mu kwezi kwa Munyonyo 2016.

Barack OBAMA yashigikiye icese Hillary Clinton

Nk’uko tubikesha VOA, umukuru w’igihugu Barack Obama yabishikirije kuri uwu wa kane, mu masanamu (Video) yasohowe, ku kibanza ngurukanabumenyi c’abajejwe igikorwa c’ukwiyamamaza ca Hillary Clinton.

Barack Obama yahayagije Hillary Clinton, atangaza icese ko amushigikiye, avuga mbere ko yibaza ko ata muntu n’umwe afise ubushobozi bw’’ukuba umukuru w’igihugu wa Reta zunze ubumwe za Amerika, nka Hillary Clinton.

Obama yavuze ko Hillary Clinton afise ubutwari, umutima w’ukwumva abandi, hamwe n’umutima w’ukuragura neza akazi.

Ingingo y’umukuru w’igihugu Barack Obama y’ugushigikira icese Hillary Clinton yahaye inguvu abajejwe igikorwa c’ukwiyamamaza ciwe, mu gihe agiye gushimikira ku gikorwa c’uguhangana, na Donald Trump, yitezwe guserukira umugambwe w’Abarepublika mu matora y’umukuru w’igihugu yo muri Munyonyo 2016.