Accueil > Inkino > basketball > Basketball : Ihiganwa rya Zone 5 ryaraye ritanguye i Bujumbura
Basketball : Ihiganwa rya Zone 5 ryaraye ritanguye i Bujumbura
mardi 6 Myandagaro 2013
Ihiganwa ry’urukino rwa basketball zone 5 ryari ririndiranywe igishika n’abakunzi b’urwo rukino rwa basketball ryaratanguye kuri uno wa mbere igenekerezo rya 5 Myandagaro 2013 i Bujumbura.
Ibihugu 5 bikaba arivyo vyaserukiwe muri iryo higanwa. Aha twovuga nk’igihugu c’Uburundi, ibihugu bibanyi nk’Urwanda, Kenya,Tanzaniya hamwe na Ouganda.
Ku ruhande rw’abagabo hari imirwi 6 : umurwi Espoir wo mu gihugu c ’Urwanda, New stars n’Urunani yo mu Burundi umurwi wo mu Burundi, Vijana yo mu gihugu ca Tanzaniya, Warriors wo mu gihugu ca Ouganda hamwe na Usiu wo mu gihugu ca Kenya.
Ku ruhande rw’abakenyezi naho,imirwi 7 niyo izohura, aha twovuga nk’umurwi les gazelles hamwe na Berco stars yo mu Burundi, APR wo mu gihugu c ’Urwanda, Usiu hamwe n’umurwi Eagle wings wo mu gihugu ca Kenya, Don Bosco wo muri Tanzaniya, KCCA wo muri Ouganda.
Inkino z’abahungu zigabuye mu mice ibiri. Itsinda rya mbere ririmwo Urunani, Espoir hamwe na Usiu.
Itsinda rya kabiri rigizwe na News stars, Warriors hamwe na Vijana.
Ku ruhande rw’abigeme naho nyene hari imice y’itsinda ibiri. Eagle wings, APR, Gazelles hamwe na Don Bosco. Mu rindi tsinda hari Berco stars, KCCA, Usiu.
Urukino rw’abakobwa rw’ejo rwahuje umurwi wa les Gazelles wo mu Burundi hamwe na APR wo mu Rwanda, urukino rukaba rwarangiye ku ntsinzi ya les gazelles ku manota 50 kuri 35 y’umurwi wo mu gihugu c’Urwanda.
Umurwi wa Espoir w’Urwanda niwo watsinze Urunani ku manota 60 kuri 41 y’Urunani.
Twobamenyesha ko ibirori vyo kwugurura iryo higanwa vyabaye igihe c’isaha cumi n’imwe y’umugoroba, imbere y’uko haba urukino rwa New stars n’umurwi wo mu gihugu ca Uganda Warriors.
Ihiganwa rya zone 5 ni ihiganwa riba ku mwaka ku mwaka, rigategurwa na FIBA Afrique, ishirahamwe mpuzamakungu rya basket muri Afrika. Iryo higanwa rikaba rihuza imirwi yatsinze mu bihugu vy‘Afrika y’ubuseruko.
Floxella Karire
