Big Fizzo yaronkejwe ubushimwe bwinshi muri TopTenTube Music Awards 2014

Igiteramo co gutanga ubushimwe mw’igihiganwa TopTenTube Music Awards 2014 ritegurwa n’insamirizi Bonesha FM caraye kibaye ukuri kwamye. Big Farious yabaye uwa mbere yatwaye ubushimwe bwinshi mu bisata bitatu vy’amahiganwa. Abantu batari bake hagwiriyemwo urwaruka bari bitavye ivyo birori. Patrick Nduwimana arongoye Bonesha FM asaba gukorana n’abarongoye ibimenyeshamakuru gukorera hamwe, kugira bagure igikorwa asaba kandi Reta gusubiramwo ingingo igenga ubunywero kuko ikandamiza ikanagabanya ubutunzi.

Patrick Nduwimana ariko ashikiriza ijambo

Ihiganwa TopTenTube Awards 2014 rituganywa ni nsamirizi Bonesha FM ryaraye risozereye igikorwa ryari rimaze umwaka urenga ritunganya ( Kuva muri Ruheshi 2013 - Ruheshi 2014). Patrick Nduwimana arongoye iyo nsamirizi mw’ijambo ryiwe yarashimiye abantu bose bagize ico batereye kugira ico gikorwa kigere kuri uwo munsi. Yarashimye kandi itera mbere aho bavuye mu bibanza vyaga bagahabwa ikibanza cagutse (Terrain dit du Parquet) gishobora kwakira abantu benshi. Yaranagarutse cane kw’itegeko ry’icegera ca mbere c’umukuru w’igihugu rigenga ubunywero aho asaba ashimitse ko ryosubirwamwo. Patrick asaba kandi ko mu mwaka uza boja hamwe n’izindi nsamirizi n’ibinyamakuru bakagira ikintu kinini.

Igiteramo ca TopTenTube Awards 2014 citabwe n’abantu isinzi bagwiriyemwo urwaruka, abamenyeshamakuru batandukanye, eka n’abaririmvyi batari bake bari bahishikiye. Icatangaje aba n’abandi n’indirimbo zirwiriyemwo imvamakungu zaravugijwe cane kandi ico gikorwa cavuye, ku ruhande rumwe, mu kiganiro "AKIWACU" cagenewe umuziki w’Uburundi n’Abarundi.

Inyuma y’intambo n’igiteramo cagirishijwe n’abaririmvyi nka Spok’s n’umurwi wiwe, umurwi Overdo, abatamba bari mu murwi "Code" eka n’abandi, ibirori vy’ugutanga ubushimwe vyaciye bitangura. Ubushimwe bwatanzwe uku gukwirikira:

1) Ururirimbo "Yahaya" rwa Big Fariouz rwahawe amajwi benshi ivyo bita "Choix du Public mu kiganiro « AKIWACU »

2) "Mot de Passe" rwa Yoya rwabaye ururirimbo rwa mbere rw’umwaka,

3) Big Fariouz yatowe nk’umuririmvyi wa mbere w’umwaka,

4) Spok’s yabaye umuririmvyi yamenyekanye muri uno mwaka (Revelation de l’annee)

5) Lizer Classic yabaye umuhinyanyuzi wa mbere w’umwaka,

6) "Umwami w’Ibirere" ya Dj Prince yabaye isanamu ya mbere

7) " Who you are" ya Big Fariouz na Samantha yabaye indirimbo yakorewe hamwe ( Meilleure Collaboratio),

8) " Icamwa " rwa Peace and Love, rwatwaye agashimwe k’ururirimbo ruvanze akaranga n’ubuhinga bugezweho (Tradi - Moderne)

9) "Number One" rwa Diamond rwatwaye agashimwe k’ururirimbo rwa mbere rwo mu karere,

10) Ururirimbo rwa mbere mpimbazamana rwa Redemption Voice

Mwomenya ko muri ubwo bushimwe, Big Fariouz yaronsemwo butatu wenyene, ikindi n’uko bamwe mu bamenyeshamakuru bataronkejwe uburenganzira bukwiye kugira bafate amasanamu kandi biri mu kazi kabo ka minsi yose kugira akazi kabo gakorwe neza.

Fizzo na Samantha bahawe agashimwe ku ruririmbo bakoranye

Abakobwa bo mu murwi "Code" baguma bihanagura akuya

Spok’s ati:" uno mwaka naramenye ku mpande zose"

bamwe mu bamenyeshamakuru baraho