Bubanza : Imbonerakure zafashwe ziriko ziriba zaciriwe urubanza

Sentare nkuru y’i Bubanza yaciriye urubanza urwaruka indwi rw’Imbonerakure za CNDD FDD rwafashwe ruriko rusahura abanyagihugu kw’ibarabara Bujumbura - Cibitoke, ku musozi Kigwema, komine Gihanga, intara ya Bubanza, mw’ijoro ryo ku munsi w’imana rishira uwa mbere. Izo mbonerakure zahanishijwe umunyororo w’umyaka wose, n’amande y’ibihumbi mirongo itanu.

Mu rubanza rw’ikibiriraho rwashashe mu ntahe yo kuri uwu wa mbere, sentare nkuru y’i Bubanza yafatiye igihano co gupfungwa umwaka wose, n’ugutanga amande y’ibihumbi mirongo itanu, ku rwaruka indwi rw’imbonerakure za CNDD FDD, rwagirijwe icaha c’ugukizura, kandi rutabifitiye uruhusha. Urwo rwaruka rwagirijwe kandi ubusuma, bakaba bafashwe bariko bariba abanyagihugu kw’ibarabara Bujumbura - Cibitoke, bitwaje ibirwanisho. Umwe muribo yahora ari umusirikare w’igihugu yari afise inkoho yarashoboye gusiga abajejwe umutekano, abasigaye nabo bakaba bafatanywe amahiri, imbugita n’imipanga. N’aho abaharanira agateka ka zina muntu mu ntara ya Bubanza bavuga ko ico gihano kidakwiranye n’igihanishwa ubusuma bw’abafatanywe ibirwanisho (vol à mains), barashima n’ukwo kubona ubutungane bwarashoboye gucira urubanza izo mbonerakure, kuko ribaye irya mbere, bagasaba n’izindi ntara ko zofatira akarorero kuri sentare nkuru y’i Bubanza.

Abo baciriwe urwo rubanza baremera ivyaha bagirizwa, ariko bakamenyesha ko ivyo bariko barakora bari babitumye n’ababarongoye mu mugambwe CNDD FDD i Bubanza. Tubibutse ko mu gatondo ko munsi w’Imana ariho urwo rwaruka rw’Imbonerakure z’umugambwe CNDD FDD rurongowe n’uwutwara Imbonerakure ku mutumba Kagwema rwafatwa ruriko rutegera imiduga yunguruza abantu kw’ibarabara Bujumbura - Cibitoke, rukaba rwatwara ivyo rusanganye abo bantu, nk’amafaranga, terefone ngendanwa n’ibindi. Igihe abajejwe umutekano bahashika, basanze urwo rwaruka rwitwaje amahiri n’imipanga, umwe muribo yari afise inkoho n’ivyo bari bamaze kwiba aca atungwa n’ayo yameze.

Umukuru w’umutumba Kagwema aremera ko urwo rwaruka rwafashwe ari Imbonerakure z’umugambwe CNDD FDD, kandi ko rwari rusanzwe rwidogerwa n’abanyagihugu ko rusahura mu mihana no ku mabarabara. Kuri uwo mutumba Kagwema, abanyagihugu ishavu riraniga, kuko bavuga ko bahora bama bibwa, ariko ntibashobore kumenya ababikoze. Kuva urwo rwaruka rugifatwa, uwutwara urwaruka rw’Imbonerakure mu ntara ya Bubanza yamenyesheje ko ababikoze batabitumwe n’umugambwe CNDD FDD, babikoze ku gatwe kabo, ari naco gituma umwe wese yokwagirizwa akongera agahanwa ku gatwe kiwe.