Bugarama : Abanyagihugu bafise amakenga ko bashobora kwinjiranwa n’inzara

Imvura imaze iminsi irwa ari nyinshi muri komine Nyabitsinda intara ya Ruyigi yarabomoye amazu arenga mirongo itanu, umuntu umwe arakomereka, hamwe n’inka yapfuye. Muri komine Bugarama y’intara ya Muramvya, abanyagihugu batabaza abagira neza, kuko bashobora guterwa na kigoyi kubera imvura yatwaye ibiterwa vyabo.

Kuva ku munsi wa gatanu w’indwi twaraye dusozereye, imvura irwa ari nyinshi mu mihingo itandukanye y’igihugu c’Uburundi, igasiga yononye ibintu bitari bike. Muri komine Nyabitsinda na Kinyinya z’intara ya Ruyigi, iyo mvura yabomoye amazu agera kuri mirongo itanu, umuntu umwe arakomereka, inka imwe n’ibindi bitungwa bihasiga ubuzima, hamwe n’imirima yahononekariye.

Muri komine Bugarama y’intara ya Muramvya, imvura yaguye ku munsi wa gatandatu yagiye itwaye ibiterwa bigizwe n’imboga hamwe n’ibiraya. Abanyagihugu bo muri iyo komine bafise amakenga ko bashobora guterwa n’inzara, bagasaba abagira neza ko bobaha imfashanyo yoba igizwe n’imfungurwa hamwe n’imbuto zirobanuye.