Bujumbura :Amatohoza kw’isha ry’isoko yatanguye

Inyuma y’iminsi itatu habaye isanganya y’ umuriro watumye isoko ya Bujumbura isha, umugwi w ‘amatohoza watowe n’umushikirizamanza mukuru wa republika Valentin Bagorikunda kugira amatohoza waratanguye igikorwa cawo kuri uyu wa kabiri.

Uwo mugwi ukaba urongowe n’icariho c’umushikirizamanza, Gervais Hajayandi.
uwo mugwi ugizwe n’abacamanza ba sentare nkuru y’igihugu hamwe nabo igipolisi cegamiye iyo sentare. Uwo wahawe imisi 60 kugirango uzobe washikirije ivyo watohoje.

Umushikirizamanza mukuru wa republika avuga ko uwo mugwi ufise ububasha uhabwa n’amategeko ari naco gituma izokwumviriza umuntu wese agomba gutanga umuco kucatumye iyo mpanuka iba.

Hambavu y’ico gikorwa haguma hatangwa ubutumwa bwo guhoza abagize ivyago aha twovuga nk’umugambwe FRODEBU ishirahamwe, mpuzamasendika, abashingamateka b’ishirahamwe rya Afrika y’ubuseruko bari mu nama yabo i Bujumbura ndetse n’uwuserukira reta zunze ubumwe za Amerika m’u Burundi.

Abaserukira reta zunze ubumwe za amerika i Bujumbura bakaba baremeye gushigikira abahuriye n’ivyago mw’isoko ya Bujumbura.