Burkina Faso : Abasirikare nibo bagiye kurongora ubushikiranganji bukomakomeye

Reta mfatakibanza ya Burkina Faso yaraye ishinzwe, nk’uko umunyamabanga mukuru wa Reta Alain Thierry Ouattar, yabishikirije ku mugoroba wo kuri uno w’Imana igenekerezo rya 23 Munyonyo.

Iyo Reta ikaba igizwe n’abasirikare bane, babiri bakaba bahawe kurongora ubushikiranganji bukomakomeye nk’ubushikiranganji bwo kwivuna abansi, hamwe n’ubushikiranganji bw’intwaro yo hagati mu gihugu.

Lieutenant colonel Issac Zida agiye kurongora amabanga y’ubushikiranganji bwa mbere afadikanije n’amabanga y’ubushikiranganji bwo kwivuna abansi. Michel Kafando nawe umukuru w’ico gihugu akazofatanya ayo mabanga no kuba umushikiranganji ajejwe imigenderanire y’ico gihugu n’ayandi makungu. Colonel Auguste Barry, basanzwe begeranye cane na Zida,akaba yagenywe kuba umushikiranganji w’ubutaka n’umutekano. Ukuyemwo rero Kafando hamwe na Zida, iyo Reta mfatakibanza ikaba igizwe n’abashikiranganji 24.

Michel Kafando rero umukuru w’igihugu mfatakibanza akaba afise igikorwa co guca ategura amatora y’umukuru w’igihugu ategekanywa mu kwezi kwa Munyonyo 2015.