Burundi : Intambamyi ziracariho mu bwigenge bwo kumenyesha amakuru

Umunsi mukuru mpuzamakungu wahariwe ubwigenge bwo kumenyeshamakuru uri mu gushika mu Burundi, mu gihe hacibonekeza intambamyi zitari nke muri uwo mwuga, kuko hari igihe abamenyeshamakuru baburabuzwa.

Igenekerezo rya 3 Rusama uko umwaka utashe, Uburundi burahimbaza umunsi mpuzamakungu wahariwe ubwigenge bwo kumenyesha amakuru.
Agatonique Barakukuza wo mu murwi uriko utegura ihimbazwa ry’uwo munsi mukuru avuga ko ubwigenge buhari baravye iyo bavuye, kuko hari ibimenyeshamakuru vyinshi bihari, kandi bigashobora gushikiriza amakuru atandukanye naho rimwe na rimwe abamenyeshamakuru bavyo baburabuzwa, abandi bagapfungwa nk’uko vyibonekeje kuri Hassan Ruvakuki mu mwaka uheze w’2013, hamwe n’abamenyeshamakuru bakorera amaradiyo yigenga bamaze iminsi baturatuzwa.

Agatonique Barakukuza atanga uturorero twa Alexis Nibasumba akorera Bonesha FM Rumonge, Alexis Nkeshimana akorera Bonesha FM i Bubanza, hamwe na Eloge Niyonzima akorera RPA, aho bamaze iminsi barengutswa bongera bagirwako iterabwoba bivanye n’amakuru bashikirije.

Agatonique Burakukuza amenyesha ko yizera ko kuri iryo genekerezo rya 3 Rusama azoba ari akaryo keza ko kuganira hagati y’abamenyeshamakuru hamwe n’abarongoye igihugu.