Burundi : Inyigisho mu mashure ziriko zirisunga izo mu karere ka EAC

Ubushikiranganji bw’indero bwifatanije n’ubw’iyinjira ry’Uburundi mu karere k’Afrika y’Ubuseruko, bwatunganije ikiganiro ku bamenyeshamakuru, aho ubwo bushikiranganji bumenyesha ko hakiri bimwe bikigoranye mu nteguro y’ivyirwa mu kwisunga akarere Uburundi burimwo.

Mu bushikiranganji bw’indero bavuga ko bariko baragerageza mw’itunganywa ry’ishure nshingiro mu gihe bibonekako iryo shure rigifise tumwe mu tugorane na cane cane ko ariho rigitangura mu Burundi. Ku bwa Chantal Bajinyora umuyobozi w’igisata c’indero mu bushikiranganji bw’indero, avuga ko naho ishure nshingiro rimaze imyaka mike ritanguye, Reta y’Uburundi imaze gukora ibitari bike, haba mu kwubaka amashure, gutanga inyigisho ku bigisha no kuronderera ibitabu abanyeshure.

Ku kibazo c’ukwo ubumenyi bw’abanyeshure buriko burasubira inyuma aho gutera imbere, Bajinyora akaba yishuye ko ubumenyi butotera busubira inyuma kandi abigisha bama baronswa inyigisho ku vyirwa bishasha bisa n’ivyatanguye mu mashure nshingiro. Aha akavuga nk’ururimi rw’icongereza, igiswahili, n’icirwa c’ukwitunganiriza imigambi n’imyuga, abigisha mw’ishure nshingiro bama bariko barahabwa inyigisho zavyo.