Bururi : Abakenyezi bahamagarirwa kuja ahabona

Abakenyezi bo mu ntara ya Bururi ntibaserukiwe neza mu bisata bitandukanye vy’ubuzima bw’igihugu.

Ivyo biri mu ruganda rw’iminsi ibiri rwari rwatunganijwe n’ishengero rya Anglicane. Ikiganiro catanzwe na buramatari w’intara ya Bururi Gloriose Nimenya, akaba avuga ko ku misozi igera kuri 198, imisozi yonyene icenda ariyo irongowe n’abakenyezi nayo amashure agera kw’152, abayobozi bayo ari 3 gusa.

Buramatari w’iyo ntara akaba asaba abakenyezi kwitoza ari benshi, kandi bakazosidukana n’iyonka mu matora, kugira baze bashobore gushirwa mu bisata bifata ingingo mu gihugu ari benshi. Abakenyezi b’abarundikazi rero bagasabwa kutama bari ahinyegeje gusa, nyabuna baje ahabona atagutinya canke kwikengera.