Butaganzwa : Abanyagihugu basaba abagiraneza kubagarukirako

Imvura yaguye muri komine ya Butaganzwa intara ya Ruyigi yarononye ibitari bike harimwo imirima, inyubakwa, ndetse na zimwe mu nyubakwa z’amashure zikakaba zitasizwe inyuma n’iyo mvura ivanze n’igihuhusi.

Iyo mvura yaguye muri komine ya Butaganzwa igahitana ibitari bike, yononye ibirasi bine. Ababibonye, bakavuga ko Imana yacanye kuko iyo mvura ivanze n’umuyaga w’igihuhusi yaguye mu gihe abanyeshure bari mu kiruhuko c’igice ca mbere c’amashure. Umuyaga rero ukaba wari ufise umuvuduko udasanzwe, mu gihe imirima itandukanye yagurutse, ikononekara cane.

Abahuye n’iyo ngorane y’iyo mvura ivanze n’umuyaga w’igihuhusi, bakaba basaba ko
abagiraneza bobagarukirako, kuko inzara yo igiye kubica mu gihe atacasigaye mu murima. Basaba ndetse n’abarongoye intwaro muri iyo komine, kudodora mu bagiraneza batandukanye kugira baronke abobagarukirako, amashure yabomotse asubire asanurwe, abana baze baronke aho bigira muri iki gice ca kabiri buca gitangura.