Buterere : Ingorane y’abigisha, ibirasi n’intebe irabangamiye abarerwa

Ishure ritoya rya Buterere ya mbere rifise ingorane z’ibirasi n’intebe, naho mu bumenyi umuyobozi w’iryo shure avuga ko bwifashe neza aravye uko abanyeshure batora ikibazo ca Reta.

Mu cegeeranyo casohotse mu kwezi kwa Ruhuhuma uyu mwaka, cerekana ko iryo shure rifise abanyeshure bangana 3218, abahungu ni 1548 abigeme nabo bakaba 1670. Nk’uko umuyobozi wa Butere ya mbere abivuga, muri uyu mwaka w’ishure, mu gice ca mbere haragaragaye abahevye amashure bagera kuri 21. Muri abo, abigeme ni umunani, abahungu nabo ni 13.

Joceline Kandagano rero avuga ko ishure arongoye rifise ingorane z’ibirasi, intebe n’abigisha, kuko ishure ryose rifise abanyeshure bangana canke barenga 70. Mu mashure y’uwa mbere ho, biragoye cane, kuko hari imirwi ine, ibiri mu gatondo hamwe n’ibiri inyuma y’umutaga. Ishure ryose muri ayo y’uwa mbere, rikaba rifise abanyeshure batari munsi y’ijana. Iyo ngorane y’umurebgera w’abanyeshure igaca ihurirana n’uko hari n’intebe zike cane.

Uyo muyobozi avuga ko ibice birenga kuri 63 bimenya mu mwaka wa gatandatu, ariko bafise ingorane y’abigisha. Uyo muyobozi agasaba ko abigisha yari yasavye ubushikiranganji bagera kuri 14 yobaronswa, mu gihe iryo shure rifise abigisha 40 gusa.