Ubushinwa : Umusore yitemye ikiganza kubera gukunda ubuhinga ngurukanabumenyi

Mu gihugu c’Ubushinwa hari umwana w’umuhungu w’imyaka cumi n’icenda yikase ikiganza c’i buryo kuko asigaye yararemaye, umutima wose ukaba wari usigaye uri ku buhinga ngurukanabumenyi "Addiction à Internet", aho muri ico gihugu c’Ubushinwa bakaba babifata nk’indwara.

Uwo musore vyari vyamurambiye ukuntu umutima wiwe wose wari waratwawe n’ubuhinga ngurukanabumenyi, nikwo kwiyumvira ico yokora kugira bikunde abihebe, aca yica ikiganza c’i buryo. Uwo musore akaba yaciye afata itagisi imushikana ku bitaro kugira bashobore kumuvura. Imbere yo gukora iryo bara, uwo musore rero yari yagerageje kwinyegeza nyina aca asohokana imbugita bakoresha mu gikoni. Abaganga rero babifashijemwo n’igiporisi bakaba bashoboye gutora ico kiganza yitemye kugira bashobore kugishona, n’ubwo ata mahirwe babonye ko ashobora kugarukana ikiganza ciwe uko cari kiri. Nyina w’uwo musore akaba yaratangajwe n’iyo nyifato y’umuhungu wiwe.

Tubamenyeshe ko mu mwaka w’2008, Ubushinwa bwafashe nk’indwara, ugukunda ubuhinga ngurukanabumenyi ku rugero rurengeje. Guhera ubwo, baciye bashinga ibigo vyabigenewe, kugira bishobore kuvura abo bose bafise iyo ndwara. Igitangaje muri ico gihugu, n’uko ibigo amajana abiri na mirongo itanu bimaze kubaho, nk’uko bishikirizwa n’ikigo kimenyesha amakuru Reuters, aho rero muri ivyo bigo hakaba hugaraniwe urwaruka rutari ruke, rukaba mbere rutorohewe na gato kuko barukoresha imyimenyerezo umenga ni iya gisirikare. Abatari bake bakaba bavyiyamiriza, mbere hakaba hari umusore w’imyaka 15 yahasize ubuzima, umunsi wa mbere nyene ahashika kugira bamukuremwo ivyo bintu vyo gukunda urubuga ngurukanabumenyi birengeje (Desintoxication àInternet).