Chris Brown ashobora gupfungwa imyaka ine

Chris Brown yatanguye kwumvirizwa mu butungane, kandi agashobora guhanishwa umunyororo w’imyaka ine mu gihe yokwagirwa n’icaha c’isanganya yoba yarateje mu kwezi kwa Rusama guheze.

Igihe ejo kuri uyu wa 15 Mukakaro yitaba mu butungane bw’i Los Angeles kugira yisigure ku vyaha yagirizwa vy’iryo sanganya ryo muri Rusama, uyo mutamvyi akongera akaba n’umuririmvyi w’umunyamerika yarashoboye kuronswa ubwigenge ariko akazosubira kwitaba umunsi wose azoba atumweko. Uyo yahoze ari umugenzi pfa mpfe wa Rihanna, ashobora gupfungwa imyaka igera kuri ine hamwe yokwagirwa n’icaya. Chris Brown kuva mu mwaka w’2009, yagiye araca mu bintu bitameze neza, kuko kuva ico gihe yagiye aravurwako amajambo atameze neza ku bijanye n’urukundo rwa be na Rihanna.

Ngo naho rero Chris Brown yagize Imana ejo agasohoka amahoro mu butumgane, ku wa 16 Myandagaro uyu mwaka, arashobora kutahasimba kuko ubutungane bwipfuza kumenya uko bigenda kwose uwateje iryo sanganya, naryo rikaba rikekwako Chris Brown. Uyo muririmvyi w’umunyamerika afise imyaka y’amavuko 24, aragirizwa kandi kuba uruhusha rwiwe rwo kugendesha umuduga rwoba rwaraheze, ariko akaguma arukoresha, co kimwe no kwanka gutanga ibiharuro ndanga kori vyiwe.

Asohotse mu butungane, Chris Brown yavuze ko Imana ariyo nkuru kandi ko yizeye gutsinda urubanza na rirya muri iryo sanganya ata wapfuye canke ngo akomereke. Ariko kandi aremeza ko ivyo yasabwe n’igipolisi, harimwo amakuru amwe amwe ku bijanye n’iryo sanganya, vyose yabigize ukwo yabisabwe.