Cibitoke : Abantu batatu bacukura ubutare baguweko n’umusozi

Abantu batatu bacukura ubutare barapfuye abandi babiri barakomereka bivuye k’umusozi waguye wabasenyukiyeko. Ivyo bikaba vyashitse kuri uyu wa kane igenekerezo rya 7 Ruhuhuma 2013 mugihe bariko baracukura ubutare ku musozi Gihura zone Butahana komine Mabayi mu ntara ya Cibitoke.

Abo bitavye Imana ntibari bonyene barikumwe n’abandi batari bake, 25 muribo barashoboye gukiza amagara yabo baciye mu mwobo ushobora guseruka ku musozi.

Iryo sanganya ryabaye inyuma yaho mu ntara ya Muyinga abantu munani bacukura ubutare bapfuye babuze impwemu abandi cumi n’abatanu barakomereka ku munsi wa kabiri biturutse kuri iyo mpanuka nyene i Kamaramagambo muri komine Butihinda mu ntara ya Muyinga.