Claude Le Roy yasezereye umurwi nserukira gihugu wa RDC

Claude Le Roy yahora amenyereza umurwi nserukira gihugu wa Repubulika iharanira intwaro rusangi ya Congo yaraye amenyesheje ko asezereye kumenyereza uwo murwi nserukira gihugu, kuva ku musi w’ejo igenekerezo rya 20 Ruheshi 2013. Iyo nkuru yatanguye gukwiragizwa mu gisagara ca Kinshassa haraheze imisi, akaba yagiye kuyemeza ku musi w’ejo.

Uwo mumenyereza aturuka mu gihugu c’Ubufaransa akaba ahagaritse ayo mabanga yiwe imisi mike gusa uwo murwi utakaje amahirwe yo kuja mu gihugu ca Bresil mw’ihiganwa ry’igikombe c’isi yose, mu mwaka w’2014, ubu akaba yamaze kwurira indege imushikana mu gihugu c’Ubufaransa.

Claude Le Roy yigeze kuba amenyereza umurwi nserukira gihugu wa Cameroun, Sénégal na Ghana yatanguye akazi ko kumenyereza umurwi nserukira gihugu wa Repubulika iharanira intwaro rusangi ya Congo kuva mu mwaka w’2006. Amasezerano yiwe yoheze mu kwezi kwa Nyakanga 2013, ariko akaba yarumvikanye n’abarongoye ishirahamwe ry’umupira w’amaguru muri ico gihugu, baramwemerera ko yohagarika naho hatari bwagere.

Abakunzi b’umupira w’amaguru mu gihugu ca Repubulika iharanira intwaro rusangi ya Congo bakaba bamenyesha koi co bazokwama bibukirako Claude Le Roy ari ukungene yashoboye gushikana umurwi mw’ihiganwa ry’imirwi nserukira gihugu ya Afrika, igikombe c’umwaka w’2013.