CNCA : Umugambi CSLP2 ntiwananiwe gushika kw’ihangiro wihaye

Muri kigo CNCA kijejwe kwegeranya imfashanyo, imvugo si mwe n’abavuga ko wa mugambi wa kabiri wo kurwanya ubukene CSLP2 woba wananiwe gushika kw’ihangiro wihaye, nk’uko bishikirizwa na Pamphile Muderega, umunyamabanga ntayegayezwa muri ico kigo.

Pamphile Muderega umunyamabanga ntayegayezwa mu kigo kijejwe gutorokanya imfashanyo za Reta, amenyesha ko abo bavuga ko ihangiro ry’uwo mugambi ritashitse, hakiri kare, kuko batararaba ico uwo mugambi wahinduye mu buzima bw’abanyagihugu.

Mu kiganiro n’abamenyeshamakuru co kuri uno wa gatatu, igenekerezo rya 17 Kigarama, Pamphile Muderega yavuze ko bashimishwa n’imfashanyo zari zemewe n’abafasha Uburundi zimaze gutangwa kuko zirenga ibice 85 kw’ijana z’ayari yemewe mu nama yabereye i Génève.

Pamphile Muderega umunyamabanga ntayegayezwa mu kigo kijejwe gutorokanya imfashanyo za Reta

Pamphile Muderega agira ati : "Imbere y’uko inama y’i Génève iba, Uburundi bwari bwerekanye ko bukeneye imiriyaridi 3,6 z’amadorari y’abanyamerika, kugira bushire mu ngiro umugambi wa kabiri wo kurwanya ubukene. Inyuma y’iyo nama y’i Génève, mu manama yabaye i Bujumbura, basanze bihenze kuko bafashe amafaranga akoreshwa mu bindi bihugu nka Tanzaniya n’Urwanda baca bayashira yose mu kivunga, ariko bamaze gutosora basanze amafaranga akenewe ari imiriyaridi 4,5 z’amadorari y’abanyamerika.

Muri ayo mafaranga yemewe n’abafasha Uburundi, Pamphile Muderega avuga ko gushika kuwa 30 Gitugutu uno mwaka bari bamaze kuronka amafaranga angana n’imiriyaridi zibiri n’imiriyoni amajana atandatu na cumi n’icenda ni ukuvuga ibice birenga 87,3 kw’ijana. Agira ati : "Umuntu ntashobora kuvuga ko uwo mugambi udashobora kuja mu ngiro kandi kuri ayo mafaranga imiriyaridi 4,5 z’amadorari zari zemewe hamaze gutangwa imiriyaridi zirenga zibiri n’ibice bitandatu.

Mu kigo CNCA bavuga kandi ko uwo mugambi ukiri ku mwaka wa gatatu, kubw’ico kigo, barabona ko uwo mugambi uzogenda neza. Ku cerekeye naho ko vyananiranye ko uwo mugambi ushika kw’ihangiro kuko hari ukutamenya ku bakozi bakuru bakuru ba Reta, Pamphile Muderega aremeza ko hagikenewe inyigisho.

Mu kigo CNCA batanze izo nsiguro inyuma yaho Faustin Ndikumana arongoye ishirahamwe PARCEM ashikirije amakenga afise, aho mbere yavuze ko abategetsi bamwe bamwe barabwa n’uwo mugambi botanga imihoho, kuko ahanini uwo mugambi usa n’uko vyanse k’ushika kw’ihangiro ryawo, kuko habuze itegurwa ry’imigambi itomoye, kimwe mu vyatumye imfashanyo zitaza.