CONAPES iragabisha Leta

Abigisha bahurikiye muri CONAPES baragabisha Leta ko kuva kuri uyu wa mbere igenekerezo rya 10 Ruheshi 2013, bazoja muri yegereyegere. Ivyo bikaba vyamenyeshejwe n’umukuru w’urwo runani kuri uyu wa kane igenekerezo rya 6 Ruheshi 2013.

Manweli Mashandari umukuru wa CONAPES amenyesha ko imvo nyamukuru itumye bazohagarika imirimo, ari umushahara w’ukwezi kwa Rusama utabonetse utunenge mu gihe bategerezwa gutunganirizwa neza kuko yegereyegere baheruka kugira bamaze iminsi itanu gusa badakora.

Ikindi naco ni uko inama nshikiranganji yari itegekanijwe kuva kw’igenekerezo rya gatanu na gatandatu Ruheshi nk’uko vyari mu masezerano y’abahuje n’umushikiranganji muri komine Rumonge kugira bihweze ibijanye n’imishahara yabo, ico gikorwa kikaba kitabaye.

Kuri ivyo vyose bavuga abari muri CONAPES, Umushikiranganji w’abakozi n’akazi umupfasoni Nosiyata Sendazirasa avuga ko azogira ico ashikirije ejo ku munsi wa gatanu igenekerezo rya 7 Ruheshi 2013.