RDC : Amaradiyo atanu yahagaritswe

Amaradiyo atanu yahagaritswe mu gihugu ca Republika iharanira intwaro rusangi ya Congo. Abategetsi b’ico gihugu bakaba bavuga ko bahagaritse ayo maradiyo, kugira bashobore guhagarika ubwicanyi bukorwa n’abaroberi ba ADF Nalu, bwibonekeza na cane cane mu karere ko mu buraruko bwa Kivu hamwe no mu karere ka Beni.

Amakuru dukura kuri BBC avuga ko abo bategetsi b’ico gihugu bavuga ko ubwo bwicanyi bumaze guhitana abantu 200 mu kwezi kumwe gusa. Mu Bumanuko hoho, n’imboneshakure yahagarikiwe ibikorwa.

Ivyo bimenyeshamakure vyahagaritswe bikaba vyagirizwa gucishamwo ubutumwa bw’abaroberi b’abanya islamu bo mu gihugu c’Ubuganda basanzwe batera ubwoba abanyagihugu. Kubwa Lambert Mende umuvugizi wa Reta ya Congo, si agaseseshwarumuri biragaragara ko ivyo bimenyeshamakuru bikorana n’abo barwanyi.

Ku ruhande rw’ayo maradiyo, bararahira bakarengwa ko ata migenderanire n’imwe bafitaniye nabo baroberi ba ADF Nalu. Amashirahamwe asanzwe arwanira ubwigenge bw’abamenyeshamakuru bariyamiriza iyo ngingo kuko ije isubiza inyuma ubwigenge bwo kumenyeshamakuru muri ico gihugu.