Cristiano Ronaldo yaraye ahawe akandi gashimwe

Cristiano Ronaldo yaraye yambitswe ikanga ry’umukinyi wa mbere wo ku mugabane wa Buraya mu mahiganwa yabaye mu mwaka w’i 2013 ushira uw’i 2014. Aciye imbere umunyezamu Manuel Nueur n’umukinyi Arjen Robben.

Michel Platini na Cristiano Ranaldo

Ku mugoroba w’uwo wa kane igenekerezo rya 28 Myandagaro, Michel Platini arongoye ishirahamwe rihurikiyemwo imirwi y’umupira w’amaguru y’i Buraya (UEFA) yarahaye agashimwe umukinyi wa mbere yakoze ibikora inka mu mahiganwa yo mu mwaka w’i 2013 ushira 2014. Agashimwe kahawe umukinyi Cristiano Ronaldo akina muri Real Madrid ku nomero 7 (CR7). Cristiano Ronaldo aciye imbere ya Manuel Nueuer, umunyezamu w’umurwi wa Bayern de Munich na Arjen Robben umusatirizi wo muri uwo murwi nyene.

CR7 aje akwirikira abakinyi nka Franck Ribery umufaransa yatwaye ikibanza nk’ico mu mwaka w’i 2012-2013, Andres Iniesta yatwaye ikibanza mu mwaka w’i 2011-2012 na Lionel Messi yagitwaye mu mwaka w’i 2010-2011.

CR7 ahejeje gutora agashimwe yavuze ati:"Naritanze cane muri izo nkino ariko ndamishiye cane umurwi wanje nkinamwo kuko iyo ataba wo ubushimwe nk’ubwo buhabwa umukinyi umwe".

Cristiano Ronaldo ntiyabonetse cane mu nkino z’igikombe c’isi nk’umukinyi mpuzamakungu w’igihangange aho igihugu ca Portugal cakuye meza mu za mbere, ariko yaheruka kuronsa igikombe ca "Champions League"umurwi wiwe wa Real de Madrid. Muri ico kiringo ca Champions League yinjije ibitsindo 17.