Dyles kanyarugano umwe mu rwaruka yiyumviriye umugambi umuteza imbere

Dylès Kanyarugano umwe mu rwaruka amaze guca akenge akiyumvira gukora imigambi yomuteza imbere, ahamagarira urundi rwaruka kutihebura n’ubwo akazi kagoye kuko barafise ubumenyi n’ubuhinga bwobafasha gutegura imigambi yabo. Igikenewe gusa n’uko boja hamwe bagashira ivyiyumviro vyabo hamwe.

Mu Burundi urwaruka rumwe rumwe rwaraciye ubwenge mu gutangura kwitaba akamo kabahamagarira gutunganya imigambi yabo muri kino gihe akazi gasa n’akagoye aho ahanini usanga hakora ka nkunzi, na ka mwana wa mama mu kugatanga. Dylès n’umusore akiri muto aba mu gisagara ca Bujumbura, akaba yarangije amashure yiwe ya kaminuza mu mwaka w’2009, mu gisata co gutunganya ubutunzi( Faculté de Gestion et Administration département Marketing et management) kuri kaminuza yitiriwe Umuco. Uwo musore amaze kurangiza amashure yiwe ya kaminuza, agaheza akanasoma n’igitabo ‘’Mémoire’’ mu mwaka w’2011, akabona ko ivyo kuronka akazi bimugoye, yaciye yiyumvira be na mushiki we umugambi bokora. Niko gutora umugambi wo gukora ibitumbura bongera babishora mu ma butike atandukanye yo mu gisagara ca Bujumbura. Aho avuga ko yabifashijwemwo ahanini n’inyigisho yakuye mu mugambi wa kaminuza Lumière’ ‘’ CUFORE ’’.

Dylès Kanyarugano ntiyahereje aho kwiyumvira umugambi, nk’uko avyiganira ikinyamakuru IGIHE, mu gatondo ko kuri uno wa gatatu, yaciye arondera udufaranga akaba yatanguriye ku mutahe w’ibihumbi mirongo itanu( 50000f) ahanini akayakesha incuti n’abagenzi. Mu nyuma yaruguruje ikonti muri Coopec, mbere akaba yarasavye n’ingurane igera ku bihumbi amajana indwi, akaba ariko arondera uko yorondera iyindi.

Uwo musore akatwiganira ko be na mushiki we bazinduka nk’igihe c’isaha munani n’inusu z’ijoro bacumba bongera bakata ivyo bitumbura banabiteka, kugira igihe c’isaha cumi na zibiri z’agatondo abe yihereje ibarabara aja gutanga ivyo bitumbura. Uwo musore akavuga ko n’ubwo ataho arashika hakomeye , urudandazwa rwiwe ruramufasha mu kubaho kwiwe kwa minsi yose, ubu agashobora gufasha nko gutanga akarasiyo k’umuryango na rirya umwe mu bavyeyi biwe yari mu bushomeri, mbere aranafasha barumunawe bakiri mu mashure. Ubu rero akavuga ko ashitse ku biro 50 ku munsi mu gihe agitangura yahereye ku biro bibiri gusa. Mbere ubu akaba yarashoboye gutera imbere akaba ageze ku bakozi babiri, akaba yaraguze n’ikinga.

Tumubajije ko ata soni bimutera nk’inyindi misore yo mu gisagara usanga itinya kugendana akamwanyi, nk’uko abikora uwo musore avuga ko ata soni nimwe bimutera kanatsinda mu ndero yahawe, abavyeyi biwe baramubujije kugaya umwuga. Uwo musore avuga ko bimunezera cane kubona ashobora gutanga ikidandazwa c’akanovera, abamushorera bagashima. Mu minsi iza agashaka kugura bwa bukinga basunika Chariot kugira ashobore kuza arazana vyinshi icarimwe.

Mu ndoto ziwe Dylès Kanyarugano avuga ko yifuza kugera ahantu nawe ashika mu gufasha Reta kugabanya ubushomeri buhari mu gihugu, abicishije mu gutanga akazi. Uburyo ni bwa mukundira akaba yifuza nko gushinga ishirahamwe mu gisata c’ivyo gufungura (Agro business), arifuza kandi gushinga buranjeri. Ahanini mu ntambamyi afise akaba ari yo uburyo, kugira ashobore guha umuguzi ikintu gifise agaciro.

Uwo musore ahamagarira urwaruka rugenzi rwiwe kutihebura kuko rufise ubumenyi n’ubuhinga, maze bahaguruke barondera utwo babeshaho. Abavyeyi nabo usanga batunze ivyo bishomeri ngo ni bagerageze kurushira hamwe mu ntererano. Reta nayo yobafasha kubasabira ingurane mu ma banki.