EAC: Abakuru b’ibihugu biyemeje gukorera hamwe

Mu nama umukuru w’igihugu c’Uburundi Petero Nkururunziza yahoramwo mu gihugu c’Ubuganda, yamenyesheje aganutse i Bujumbura ko abakuru b’ibihugu bo mu karere k’Afrika y’Ubuseruko, bumvikanye gukora n’ugukurikiranira hamwe ibikorwa n’amadosiye rusangi yo mu muryango bahurikiyemwo.

Umukuru w’igihugu Petero Nkurunziza akaba yamenyesheje ko ivyagiye biravugwa ko ishirahamwe ryagira risambuke ku bw’amanama atatu yabereye mu bihugu bitatu nyene arivyo Urwanda, Uganda na Kenya ko hageze ko ivyo babirengera, bagakorera hamwe mu guteza imbere umuryango bahurikiyemwo w’Afrika y’Ubuseruko.

Petero Nkurunziza akaba yabandanije avuga ko bategerezwa gukorera hamwe mu ntumbero yo guteza imbere iryo shirahamwe bahurikiyemwo, ndetse akabandanya amenyesha ko n’umukuru w’igihugu ca Kenya ari nawe asigaye arongoye inama y’abakuru b’ibihugu bahurikiye muri uyo muryango gushika muri uyu mwaka uza w’2014, ahumuriza abibaza ko hari ugucanamwo n’ugusambuka hagati y’abavukanyi bo mu karere k’Afrika y’Ubuseruko, ko ivyo bitariko biraba ubu, kandi bitazonaba.

Ariko rero hakaba hasigaye kumenya, namba ivyashitsweko muri izo nama zitatu zagiye ziraba ari ukwo habanje gukumirwa Uburundi na Tanzaniya bizoshirwa mu ngiro, ndetse abatabiteyeko umukono, batanabikurikiranye bagashobora kuvyemeza.