Egypte : Umuporisi yaciriwe imyaka 10 y’umunyororo inyuma yo kwica abapfungwa 37

Mu gihugu ca Egypte hari igisongerezi mu giporisi caciriwe imyaka 10 y’umunyororo inyuma yaho yagiriwe n’icaha co kuba yarishe abapfungwa bagera kuri 37 b’aba islamu akoresheje ivyotsi vyokera (gaz lacrymogene).

Nk’uko bishikirizwa n’ubutungane, ubwicanyi bwagirijwe uwo muporisi bwabaye igenekerezo rya 18 Gitugutu 2013, igihe abapfungwa b’aba islamu 37 bari mu kiduga c’abaporisi. Abo bapfungwa bakaba bari bajanwe mw’ibohero ry’i Abou Zaabal, hafi y’igisagara ca Misiri.
Uwo muporisi yagiriwe n’icaha akaba ari icegera ca komiseri w’ikirindiro c’abaporisi c’i Heliopolis, mu buraruko bwa Misiri, aho ico kiduga carimwo abapfungwa cari kigiye. Yakurikiwe n’ibindi bisongerezi bitatu vyo muri ako gace nyene vyaciriwe umwaka mu munyororo, inyuma yo kwagirizwa nabo kuba barishe bongera barakomeretsa abantu bitabavuyeko.

Ivyagiriji vy’abarokotse muri ubwo bwicanyi hamwe n’intahe z’umuhinga mu bijanye n’amategeko mu bushikiranganji bw’ubutungane bikaba vyumvirijwe mu rubanza rwari rwashashe. Uwo muhinga akaba yavuze ko ico kiduga carimwo abaporisi cari kigenewe gutwara abantu 24 mu gihe igiporisi cari cashizemwo abagera kuri 45.
Ico gihano cahawe ico gisongerezi kikaba kibaye mu bihano vya mbere bitanzwe mu gisata c’igiporisi mu gihugu ca Egypte kuva aho habereye imigumuko yakurikiye itembagazwa ry’ubutegetsi bwa Morsi. Mukibuka ko hapfuye abantu barenga 1400 n’abarenga igihumbi bafashwe n’ubutungane.