ENS : Abitavye akamo ka yegereyegere bariko baraterwa ubwoba

Muri kaminuza y’inderabigisha ENS hariko haragirwa iterabwoba ku batatonze kw’ishure nk’uko twabibwiwe na bamwe mu bakozi b’iyo kaminuza.

Uwaduhaye ayo makuru, akavuga ko bagiye babona uwujejwe amategeko kuri iyo kaminuza ENS azana ibipapuro kugira hiyandike abatonze bose. Bavuga ko basanzwe bafise igitabu biyandikamwo bakanateramwo imikono ko batonze, ariko bagatangazwa n’ingene uwu musi bagiye babona hazanwa impapuro. Abo bakozi bibaza ko izo mpapuro z’abatonze zishobora guca zijanwa ku muyobozi wa kaminuza y’inderabigisha ENS, inkurikizi nazo bakaba batazizi kugeza ubu, ariko bakemeza ko ari iterabwoba gusa.

Abaduhaye amakuru, bakatumenyesha ko, baciye bahamagara bagenzi babo bari basivye kuri terefone kugira batonde. Abo bakozi nabo bakavuga ko bari bifatanije n’abandi kugira bagaragaze akababaro, ku bijanye n’ubuzima buzimvye na cane cane kw’iduzwa ry’ibiciro vyo guhamagarana hamwe n’igitoro kitamanuwe ku rugero rwo kw’isoko mpuzamakungu. Bamwe bararahira ko naho hari iryo terabwoba batageza gutonda. Ariko kugeza ubu, sendika y’abakozi ba kaminuza y’inderabigisha ENS akaba ataco iravuga, ku bijanye n’iryo terabwoba ku bakozi b’iyo kaminuza