Fiston Abdul Razak mu murwi wa Rayon Sport FC

Fiston Razak ni umukinyi uvuka mu gihugu c’Uburundi, akaba ari umusatirizi w’umurwi nserukiragihugu w’Uburundi “Intamba mu rugamba” akaba kandi ubu yamaze gutera umukono ku masezerano y’imyaka ibiri yo gukinira umurwi wa Rayon Sports yo mu Rwanda aho yari aje ava mu murwi wa Diable Noire wo muri Congo Brazzaville.

Inyuma y’ayo masezerano yamenyesheje biciye ku rubuga ngurukana bumenyi ko yumva afise umunezero mwinshi kubona ahambije umurwi wa Rayon Sports, na cane cane ko asanzemwo bagenzi biwe ba hano mu gihugu c’Uburundi , aho yagize ati "Mfise ivyizigiro ko nzobandanya ntsinda ibitsindo vyinshi hama nkitwara neza kugirango uyu murwi wa Rayon Sports utere imbere”.

Umukuru w’umurwi wa Rayon Sports, Murenzi Abdallah yamenyesheje ko baronse umukinyi mwiza kandi azwiko afise ubuhinga bukomeye muri aka karere ka Afrika y’ubuseruko mbere no muri Afrika yose, ku buryo azofasha uyu murwi kugumana igikombe ca championat mbere no kuzitwara neza mu nkino za Afrika z’imirwi yabaye aya mbere iwabo.

Mu mwaka w’2012, Fiston yahora akinira umurwi Lydia Ludic wo mu gihugu c’Uburundi. Mu nkino za Afrika z’imirwi yatwaye ibikombe iwabo, yahejeje ari umusatirizi wa kane w’ihiganwa n’ibitsindo 4. Uwo mukinnyi Fiston yagaragaye ku rutonde rw’ishirahamwe ry’umupira w’amaguru muri Afrika (CAF) rw’abakinyi 32 b’abahinga bakina ku mugabane wa Afrika.

Mu mwaka w’2013, yaguzwe na Diable noir (Congo Brazzaville). Nk’uko amakuru ava mu murwi Diable Noir yabimenyesheje, amasezerano ntiyigeze yubahirizwa cane cane ku bijanye n’umushahara, maze agaruka i Burundi aho yarindiriye amezi atatu kugira abe umukinyi arindiriye umurwi uwariwo wose womurondera.

Ubu ico abantu bakomeje kuvuga n’uko babona ko uyu murwi wa Rayon Sports ugenda wongera igitigiri c’abakinyi b’abarundi, ariko ivyo bigatanga ivyizigiro ku barundi ko abakinnyi babo bakomeye kuko bagumya baronderwa n’imirwi ikomeye ya hano muri Afrika y’ubuseruko n’ahandi.