FORSC : Umugambwe UPRONA washikiwe n’ingaruka z’ukwama wiyegereza ubutegetsi

Vital Nshimirimana, umukuru w’urunani FORSC ruhurikiyemwo amashirahamwe adaharanira inyungu za poritike amenyesha ko ingorane z’uburongozi mu mugambwe w’abadasigana zamyeho, kuko uwo mugambwe imyaka yose wamaze muri Reta wamye ufatwa nk’imperekeza. Ikibonetse ari nka gishasha ubu akaba ari uko ubutegetsi bwa CNDD FDD, buciye ku mushikiranganji Edouard Nduwimana, buriko burondera gushiraho indongozi zibuyoboka, mu ntumbero yo kurwanira inyungu budahurizako n’indongozi zari zihari za UPRONA.

Kuva muri kahise ka poritike y’Uburundi, inyuma y’umuzo w’intwaro rusangi, umugambwe UPRONA wamye uboneka nk’uwufise inguvu zibayabaye, ariko ukarondera kwama wiyegetse ku mugambwe ukomeye usanzwe uri ku butegetsi. Nk’umugambwe ugira kabiri muri Reta, UPRONA yamye ifatwa nk’imperekeza mu kwama mu kwaha kwa CNDD FDD. Ibibazo vy’uburongozi bifatiye ku nyungu zitandukanye bikaba batasivye kwama vyibonekeza muri uwo mugambwe wa Rwagasore. Mu myaka umunani yose umugambwe UPRONA umaze muri Reta ya CNDD FDD, amategeko n’izindi ngingo vyamye bifatwa n’ubutegetsi, rimwe na rimwe bukaja inama na UPRONA. Ukwo kuterekana aho bahagaze kwoba kwaratumye ubutegetsi busigara bufata UPRONA nk’umugambwe w’imperekeza udafata ingingo muri Reta usanzwe urimwo.

Ikibazo c’ihindurwa ry’ibwirizwa shingiro, hamwe na sentare idasanzwe igenga umurwi CNTB ujejwe ibibazo vy’amatongo n’ayandi matungo biri muvyadometse umuriro watumye umubano wa CNDD FDD na UPRONA utosekara. Vital Nshimirimana, umukuru w’urunani FORSC (Forum pour le Renforcement de la Societé Civile) amenyesha ko ubutegetsi buriko bukosora uwo bwahora bwita "umukunzi" yahindutse agahakana ingingo zimwe zimwe z’inyungu z’ubutegetsi.

Vital Nshimirimana, arongoye FORSC (Forum pour le Renforcement de la Societé Civile)

Mu nama yariko ihuza abanyeporitike ku kibazo c’ivyohindurwa mw’ibwirizwa shingiro, Bernard Busokoza yari icegera ca mbere c’umukuru w’igihugu, mw’ijambo yashikirije, yarijeje abanyeporitike ko integuro y’ihinyanyurwa y’ibwirizwa shingiro itegerezwa gusubizwa inyuma kugira abandi bose vyega baterere. Iryo jambo, naho ryanezereje abari bataye icizere bose, ryarashavuje ubutegetsi, ari naho ukurabana ayingwa kwoba kwaratanguye. Umukuru w’umugambwe UPRONA Karori Nditije yarasongereye isibe ubutegetsi mu kwerekana utarya umunwa ko adashigikiye ukwotoza kwa Petero Nkurunziza mu kiringo ca gatatu mu mwaka w’2015. Kubwa Vital Nshimirimana arongoye FORSC, Bernard Busokoza yakuwe kuva ico gihe, nayo ingingo yafashwe na Petero Nkurunziza yo kumukombora ikaba yaje gushira mu ngiro n’ukwerekana ko ata kibanza gikwiye bigeze bamuha muri Reta yari yitwa ko ari icegera ca mbere c’umukuru w’igihugu. Vital Nshimirimana abisigura yisunze ivyatangaje benshi mu kubona umukuru w’igihugu aha agaciro umushikiranganji karuta ak’icegera ca mbere c’umukuru w’igihugu. Petero Nkurunziza yerekanye ko umushikiranganji Edouard Nduwimana asumba uwumutwara.

Vital Nshimirimana ahamagarira ubutegetsi kudafata minenerwe ico kibazo, kuko gishobora kwandurukiramwo urwanko hagati y’amako. Uwo arongoye FORSC yisunga inyifato yerekanywe n’urwaruka rw’Imbonerakure za CNDD FDD mu ntara ya Bubanza, aho urwo rwaruka rwaraye ruravyina, rutamba, ruvuga n’amajambo atari meza avuga ko uruhigi ruhindukiye. Vital Nshimirimana agatangazwa n’abo banyagihugu bashobora kuba batari bwanabone Bernard Bosokoza, ariko bakarara bararirimba batamba ngo "Uruhigi rurahindukiye". Vital Nshimirimana akabona ko ari urwanko ruriko rurabibwa hagati y’abahutu n’abatutsi, kuko abo bariko baravyina badashobora kwerekana amakosa bagiriza Bernard Busokoza mu kiringo c’amezi atatu gusa yari amaze mu mabanga y’icegera ca mbere c’umukuru w’igihugu.