FORSC yitwaye muri sentare ica imanza za Reta ku ngingo yababuza kugira imyiyerekano

Amashirahamwe ahurikiye mu runani FORSC yituye sentare ica imanza za Reta bitwarira ingingo yafashwe n’umukuru w’igisagara ca Bujumbura n’umushikiranganji w’intwaro yo hagati mu gihugu, yabankira gukora imyiyerekano yo gushigikira Petero Karaveri Mbonimpa , bari kumwe n’amashirahamwe y’abamenyeshamakuru.

Nk’uko bivugwa na Janvier Bigirimana umushingwamanza w’urunani Forsc(Forum pour le renforcement de la societé civile), ingingo yafashwe n’umukuru w’igisagara ca Bujumbura hamwe n’umushikiranganji w’intwaro yo hagati yo kubankira iyo myiyerekano, ntiyisunze amategeko ari co gituma bashimye kwitura sentare ica imanza za reta (cour administrative de Bujumbura).

Mu runani Forsc bamenyesha ko n’ubwo ubutungane bw’Uburundi bufise ingorane, barizera ko bagiye gutunganirizwa nk’uko biri mw’ibwirizwa Nshingiro mu ngingo yayo ya 60 aho ubutungane butegerezwa gutunganiriza uwo wese arenganijwe. Tubibutse ko uyo umunsi ugize uwa 38, Petero Karaverio Mbonimpa afungiwe mw’ibohero rikuru rya Mpimba yagirizwa guhungabanya umutekano wo mu gihugu no hanze y’igihugu.