Francine Niyonsaba umunonotsi wa mbere kw’isi

Umurundikazi Francine Niyonsaba yiruka imetero 800, yaraye yerekanye ubunonotsi afise kurusha abandi kw’isi mu kwiruka mu mwanya muto.

Mu kiganiro cahawe abanditsi n’abamenyeshamakuru ejo ku munsi wa gatatu igenekerezo rya 5 Ruheshi 2013, Umukuru w’igihugu c’Uburundi Petero Nkurunziza yarashimiye bimwe bivuye k’umutima, abarundi badahengeshanya guteza imbere igihugu nka Francine Niyonkuru yerekanye Uburundi neza mu makungu mu kugaragaza ubunonotsi n’ishaka afise ryo gukora.

Inyuma y’ukuba uwa mbere mu kwiruka imetero 800 ku minota ibiri (2 :00.33), mw’ihinganwa ryo kwinonora imitsi ryo muri Rusama 2013, ryitiriwe Shanghai IAAF Diamond League Meeting ryari ryabereye mu gihugu c’Ubushinwa, ku munsi wa gatandatu urangiye, igenekerezo rya 1 Ruheshi 2013, kuri Eugene Prefontaine Classic, muri Leta zunzubumwe za Amerika, Francine Niyonsaba niwe yarerekanye ubunonotsi n’ubukerebutsi afise kurusha abandi mu gushika ubwa mbere.

Muri iryo higanwa ryabereye muri Leta zunzubumwe za Amerika, yirutse k’umunota 1 n’amasegonda 56 (1 :56.72).Francine Niyonsaba akaba yatangaje benshi uno mwaka kubona ashobora kuba uwa mbere kw’isi mu kwiruka imetero 800 ari umwigeme.

Ubu Uburundi bukaba bwaciye imbere Leta zunzubumwe za Amerika, Uburusiya na Kenya kuri izo metero. Umukuru w’igihugu c’Uburundi n’abarundi bakaba baranezerejwe no kuri iyo ntambwe Francine yagezeko. Mu kumushimira bamubwiye : « Urakoze »