Amahinyu kuri Tanganyika Tile Industry igomba yegurirwe ikibanza c’amahegitari 48,5

Ishirahamwe OLUCOME risaba inama nshikiranganji kutemeza integuro y’itegeko ryegurira ishirahamwe Tanganyika Tile Industry ikibanza c’amahegitari 48,5 kiri kw’ibarabara rya Bubanza, mu Karwema, ku birometero 26 uvuye mu gisagara ca Bujumbura.

Mw’ishirahamwe bavuga ko batangajwe ukuntu inama nshikiranganji ihindura ivyari ku rutonde rw’ivyigwa kuri uno wa gatatu igenekerezo rya 25 Ruhuhuma, aho hashizemwo integuro z’amategeko biboneka ko zigaragaramwo amahinyu, kuko zagiye gushikirizwa kuri uno wa gatatu nyene. Muri iyo nteguro y’itegeko bakaba bamenyesha ko muri ico kibanza bazohakorera amakaro avuye mw’ivu ryaho nyene, akaba azohakorera imyaka mirongo itanu hamwe inama nshikiranganji ryoramuka ryemeje iyo nteguro.
Gabriel Rufyiri arongoye ishirahamwe OLUCOME avuga ko iryo shirahamwe Tanganyika Tile Indurstry rigomba guhabwa ico kibanza ryoba rifitaniye isano n’abategetsi bamwe bo mu gihugu.

Gabriel Rufyiri arongoye OLUCOME

Gabriel Rufyiri asigura ko umuntu umwe ariwe yateye umukono kw’izina ryiwe n’iry’abana biwe, ku cegeranyo c’abagize iryo shirahamwe, bikagaragara ko ryoba ari ishirahamwe rigizwe n’umugabo n’umugore n’abana biwe batatu, kuko ibikumu vyateweko ku mazina atatu yose ari ivy’umuntu umwe, ariwe uwo mugabo nyene se w’abo bana batatu, kandi bikagaragara ko ayo mazina ari ay’abana. Gabriel Rufyiri avuga ko abagize iryo shirahamwe bose bava mu ntara ya Ngozi komine Mwumba, muri OLUCOME bakabona ko biteye amakenga, kuko bwoba ari nk’uburyo bwo kunyaga abarundi.

ibikumu vyateweko ku mazina atatu yose n’umuntu umwe

Gabriel Rufyiri asaba inama nshikiranganji kutemeza iyo nteguro igaragaramwo amahinyu atari make, akabasaba kubanza gufata umwanya ukwiye wo gutohoza imbere yo kuyemeza.