Gashikanwa: Umukenyezi yagandaguwe n’amahiri y’uwo bahoze bubakanye

Mu ntara z’Uburaruko, habandanya kuvugwa ubwicanyi hagati y’abubakanye. Muri komine ya Gashikanwa, umugabo yishe umugore wiwe amuhoye ko batakibana mu rugo.

Iryo bara rikaba ryaguye kuri uyu wa gatanu, aho umupfasoni Nizigiyimana w’imvyaro indwi, yaronka ubutumire bw’uwo bahora babana, amusaba ko yogenda bagasangira agacupa. Uyo mupfasoni rero akaba yaragiye, ariko amaze kuhashika, akaba yaciye yakirizwa amahiri, aho bivugwa ko yoba yakubiswe amahiri na muvyara wa nyene ako kabare asanzwe ari imbonerakure, eka ndetse akaba yafashijwe n’uyo mugabo w’uyo mugore.

Amakuru dukesha iradiyo ijwi ry’abanyagihugu, akavuga ko uyo mupfasoni yitavye Imana, amaze gushikanwa kwa muganga. Musitanteri wa komine Gashikanwa akaba ariwe yashoboye kumufasha mu gushika kwa muganga. Abari mu mashirahamwe rero aharanira agateka ka zinamuntu bakaba bariko basaba musitanteri gukora ibishoboka kugira abagarizwa iryo shano bahagarikwe, aha bakavuga uyo musore yafashije Nestor umugabo wa Nizigiyimana kugandagura umukenyezi wiwe.

Musitanteri rero akaba yishura ko, ivyo yakoze bikwiriye, ko ari ukurindira amatohoza y’igiporisi. Umuryango wa Nizigiyimana ukaba usaba ko ukuri kwoja ahabona, abagirwa n’amakosa bagahanwa, bikurikije amategeko.