Gihosha: Abanyagihugu basabwa kwijukira ibikorwa

Inyuma y’indwi aronse igashimwe kitiriwe « Umuyobozi mu bikorwa vy’iterambere muri Afrika, ikiringo c’umwaka w’2008-2013 » mu nama yahuje ibihugu vya Afrika n’Ubuyapani, umukuru w’igihugu Petero Nkurunziza yarongerereje ishaka mu bikorwa rusangi yakoze mu gitondo c’uwa gatandatu igenerekerezo rya 8 Ruheshi 2013, ari kumwe n’abanyagihugu bo muri komine Gihosha mu gisagara ca Bujumbura.

Abanyagihugu bo muri komine Gihosha bakaba bari bitavye ivyo bikorwa vyo gusasa amabuye mu masomero y’amashure nshingiro ya Gasenyi ya kabiri azugururwa mu kwezi kwa Nyakanga 2013.

Abanyagihugu bo mu Gihosha bakaba bamenyesheje ko bafise intumbero zibiri : kugira ibikorwa vy’iterambere ivyabo no kwerekana ko bashigikiye Sebarundi yateye iteka Uburundi n’abarundi mu gutahana agashimwe kitiriwe « Umuyobozi mu bikorwa vy’iterambere muri Afrika 2008-2013 » nk’uko kandi vyamenyeshejwe na Vianney Rukanura, musitanteri wa komine Gishosha.

Kubwa musitanteri Rukanura, umukuru w’igihugu Petero Nkurunziza ni akarorero mu kwitanga mu bikorwa, abarundi bari bakwiye kumwigirako kugira bashike kw’iterambere n’ubwigenge nyakuri biciye mw’iterambere rusangi.