Gitega : Abanywanyi ba MSD ntibashima ingingo boba barafatiwe

Abanywanyi b’umugambwe MSD mu ntara ya Gitega batekewe n’ubwoba buva ku makuru bumvise ko abajejwe umutekano bahawe itegeko ko aho bazobona abanywanyi babiri canke barenga b’uwo mugambwe ko bazoca batabwa muri yompi kuko bazoba bari mu nama itemewe n’amategeko. Mu giporisi barabeshuza ayo makuru.

Kuva aho umukuru w’umugambwe MSD mu ntara ya Gitega, Epitace Nshimirimana afatiwe agatabwa muri yompi, haciye hatangura kuvugwa muri iyo ntara amakuru ko mu giporisi bahawe itegeko ryo gufata abanywanyi ba MSD bazobona bakoraniye mu kibanza kimwe ari babiri canke barenga, kuko bazoba bari mu nama y’umugambwe itemewe n’amategeko. Nk’uko abo banywanyi babimenyesha, iyo ngingo yoba yafashwe kubera mu giporisi biyumvira ko abanywanyi ba MSD bagirira inama mu turwi, inyuma y’aho umugambwe wabo ufatiwe ibihano vyo kumara amezi ane udatunganya ibikorwa. Mu gihe ivyo bavuga vyoba arivyo, abo banywanyi bavuga ko ataho vyoba bitandukaniye n’ukubaka ubwenegihugu, kuko ata tegeko ribuza abantu babiri canke barenga kuba bahagararanye.

Mu giporisi mu ntara ya Gitega barabeshuza ayo makuru, bakavuga ko iyo ngingo itigeze ifatwa, n’ibivugwa ko abo banywanyi ba MSD bagenderezwa aho bari hose atarivyo.