Gitega : Abapfungwa 51 barekuwe vy’agateganyo

Umushikiranganji w’ubutungane Pascal Barandagiye yararekuye abapfungwa 51 mw’ibohero rikuru ry’i Gitega, mu ntumbero y’umugambi w’ugutanga ikigongwe c’agateganyo, mu kugabanya ibitigiri vy’abanyororo vyarenze urugero muma bohero nka yose yo mu gihugu c’Uburundi.

Pascal Barandagiye, umushikiranganji yamenyesheje ko abo banyororo 51 bapfunguwe mu mugambi w’ubushiranganji bw’ubutungane wo gutanga ikigongwe c’agateganyo kugira batezurire amabohero arimwo abapfungwa benshi kurusha abashobora kwakirwa n’amabohero.
Kubw’umushikiranganji Pascal Barandagiye, bahisemwo gutangurira kuri iryo bohero rikuru ry’i Gitega kubera ariryo bohero ririmwo abapfungwa bigenjeje neza kurusha abandi, kandi ari naryo ripfungiwemwo abanyororo benshi barenze abategerezwa kuba bahari.
Ibohero rikuru ry’i Gitega ripfungiwemwo abanyororo igihumbi n’amajana atatu na batandatu (1306), mu gihe ritategerezwa kurenza abanyororo amajana ane gusa (400)

Pascal Barandagiye yibukije ko ubushikiranganji arongoye bugiye kubandanya ibikorwa nk’ivyo no mu yandi mabohero yose y’igihugu c’Uburundi. Muri ubwo bushikiranganji bakaba kandi bamenyesha ko bagiye gushira mu ngiro kuva muri uku kwezi kwa Ntwarante 2014, ingingo bafashe yo guhindurira abaciriwe umunyororo w’imyaka ibiri, kandi bakoze ivyaha bibayabaye, kugira bashobore gukora bidegemvya ibikorwa vy’iterambere rusangi.