Gitega : Umugambwe MSD utera ivyatsi ivyavuzwe n’abahoze ku rugamba

Umukuru w’umugambwe MSD mu ntara ya Gitega, asaba abanyagihugu b’i Gitega n’abarundi bose kurikanura, na rirya bigaragara ko igihugu gishobora kurwa mw’isanganya ry’intambara, amaraso agaseseka.

Mw’itangazo Epithace Nshimirimana arongoye MSD i Gitega yasohoye, asaba umukuru w’igihugu Petero Nkurunziza kudaha agaciro ivyavuzwe n’abahoze ku rugamba, bashigikiwe na Jean Baptiste Nzigamasabo batazira Gihahe, umushingamateka yatowe mu ntara ya Kirundo, ko babwirizwa gushigikira ikiringo ca gatatu ca Petero Nkurunziza, aho bagabishije abazokwihereza amabarabara bose bariko biyamiriza ico kiringo.

Umukuru w’umugambwe MSD mu ntara ya Gitega, akaba yibaza ingene amatora meza yama avugwa n’umukuru w’igihugu azoba, mu gihe abo bahoze ku rugamba bagabirije kuzoyatoba, bikagaragara ko Reta idashaka igaruka ry’abakuru b’imigambwe imwe imwe bahunze igihugu nka Alexis Sinduhije umukuru w’uyo mugambwe, hamwe n’abandi.

Mu kiganiro c’uwurongoye urunani rw’abahoze ku rugamba Moise Bukuru, abo bahoze mu mihari irwana bavuze ko umukuru w’igihugu bamwitoreye rimwe gusa mu mwaka w’2010, nayo mu mwaka w’2005 batari batumye abashingamateka n’abakenguzamateka bamutoye.