Giteranyi : Amabendera y’umugambwe Uprona aguma yibwa

Abarongoye umugambwe w’Abadasigana Uprona mu ntara ya Muyinga barababajwe n’inyuruzwa ry’amabendera y’umugambwe wabo, aho muri iyi minsi bisa n’ivyimonogoje, mu makomine nka yose y’iyo ntara.

Ku bwa Olivier Nkurunziza arongoye Uprona mu ntara ya Muyinga, avuga ko amabendera y’umugambwe Uprona amaze kwibwa muri iyo ntara atagira ukwo angana, ndetse ahanini akayagiriza imbonerakure zo mu mugambwe CNDD FDD. Olivier Nkurunziza umukuru w’uyo mugambwe, avuga ko iriheruka kwibwa, ari iryari muri komine ya Giteranyi. Iryo bendera ry’umugambwe wa Rwagasore, akavuga ko abaritwaye ari imbonerakure za CNDD FDD, nk’uko n’abanyagihugu b’aho mu micungararo yo ku Kizungu aho ryibiwe bavyemeza.

Umukuru w’umugambwe Uprona mu ntara ya Muyinga, akabona ako ari agasomborotso bagirirwa n’abari mu mugambwe CNDD FDD. Asaba ko amabendera y’umugambwe wabo yokwubahirizwa aho ari, akareka kuguma yibwa atacamira.