Giteranyi : Imbibe nshasha hagati y’Uburundi na Tanzaniya ziteye amakenga

Ibimenyetso bishasha biriko birashingwa vyerekana ahaca urubibe hagati y’Uburundi n’igihugu ca Tanzaniya birateye amakenga abanyagihugu bo muri komine ya Giteranyi, co kimwe n’ab’i Mugoma mu gihugu ca Tanzaniya.

Nk’uko twavyiboneye, aho, abanyagihugu yaba abarundi canke abatanzaniya bavuga ko ariho bari bazi ko haca imbibe haraheze imyaka, ubu hamwe usanga hagiye i Burundi, ahandi ugasanga hinjiye muri Tanzaniya, ndetse imwe mu mirima canke amazu y’abarundi, bikaba vyaraninjiye muri Tanzaniya muri ivyo, vy’ugushinga imbibe, eka n’agasoko k’aho bita mw’i Bambo mu gihugu ca Tanzaniya kinjiye i Burundi.

Kuri ivyo, buramatari w’intara ya Muyinga Ildephonse Ntawunkunda, avuga ko ivyo bikorwa biriko bigirwa n’umurwi uhurikiyemwo bose, yaba abarundi hamwe n’abatanzaniya. Tukabamenyesha ko bamwe mu babuze imirima yabo, canke amazu yabo muri ivyo bikorwa kugeza ubu, bavuga ko bataramenya aho bashobora kuzitura kugira bashumbushwe, mu gihe mu gihugu ca Tanzaniya bivugwa ko uwuzobura itongo, canke ikindi muri ivyo bikorwa, azoronswa amafaranga yo gushumbushwa, canke bakamuha ikindi kintu kinganya agaciro n’ivyo yabuze.