Giteranyi : Kugaburira abana mu mashure y’intango vyatumye abaheba bagabanuka

Umugambi wo kugaburira abana watanguye mu mwaka w’2007 mu mashure y’intango yo mu ntara zimwe zimwe harimwo na Muyinga, utuma igitigiri c’abanyeshure baheba kigabanuka.

Ku bwa Anicet Minani umuyobozi w’ishure ritoya rya Giteranyi ya kabiri, avuga ko umugambi wo kugaburira abanyeshure ufasha cane kuko igitigiri c’abana baheba amashure cagabanutse. Avuga ko iyo umwana ashonje aca asiba mw’ishure. Ariko iyo umwana azi neza ko, niyaheza kwiga aza guca agaburirwa, biheza bikamufasha gutonda kw’ishure.

Anicet Minani avuga ko atari amashure yose agaburira abana, avuga ko amashure yatowe, ari amashure afise abanyeshure benshi, hamwe n’amashure ari iruhande y’amakambi y’abateshejwe izabo. Muri iyo komine, umuyobozi w’ishure rya Giteranyi ya kabiri, akavuga ko uretse ishure arongoye rigaburirwa, ayandi mashure agaburira abana ari Giteranyi I, Giteranyi III, Nyarutongo, Mangoma, Shoza, Rumandari, Makombe na Gasenyi.