Accueil > Amakuru > Muri Afrika > Guinee Bissau: Abashingamateka bemeje ko umushikiranganji wa mbere atanga (...)
Guinee Bissau: Abashingamateka bemeje ko umushikiranganji wa mbere atanga imihoho
mardi 25 Myandagaro 2015
Kuwa mbere igenekerezo rya 24 Myandagaro 2015,abashingamateka b’igihugu ca Guinée-Bissau baremeje ko umushikirananji wa mbere w’ico gihugu Baciro Dja,ko yotanga imihoho kugira ibibazo biri mu gihugu bitore inyishu.
Iyo ngingo yatowe ku majwi 75 kuri 79 inyuma y’amasaha 12 y’ibiganiro hagati y’Abashingamateka ,mu ntumbero yo kuronderera umuti ibibazo vya Politiki bitavugwako rumwe hagati y’Umukuru w’Igihugu n’abagize Reta.
Kuwa 12 Myandagaro niho umukuru w’igihugu José Mario Vaz yirukanye uwari umushikirananji wa mbere Domingos Simoes Pereira, yari amaze umwaka urenga ari muri ico kibanza, yavuze ko icatumye amukura muri ico kibanza ari uko ata cizere yari amufitiye.
Mario Vaz yaciye ashiraho Dja yigeze kuba umushikiranganji akaba n’umuvugizi wa Reta,ariko kuva umukuru w’igihugu amushira muri ico kibanza umugambwe uri ku butegetsi PAIGC ntiwigeze ushima igenwa ryiwe.
Umukuru w’igihugu ca Gambiya Yahya Jammeh aherutse kumenyesha ko yipfuza kuba umuhuza kugira ngo ivyo bibazo bitore inyishu.
Van Naris Mugisha
